Kapitolyo motabang sa mga pasyente sa VSMMC

CEBU, Philippines — Mohatag og medical assistance ang Kapitolyo sa mga pasyente sa Vicente Sotto Memorial Medical Center pinaagi sa Assistance to Individuals in Crisis Situation (AICS).

Kini human ang hunta probinsiyal nihatag og pagtugot kang Gobernador Gwendolyn  Garcia sa pagpirma og memorandum of agreement tali sa VSMMC.

Si Bokal Kerrie Keane Shimura, chairman sa committee on health sa hunta probinsiyal ang nag-sponsor sa resolusyon.

Matud ni Shimura nga ang maong MOA gitun-an pag-ayo sa Provincial Legal Office diin nalatid ang mga kondisyon sa pagpatuman sa programa. (Beverly I. Manla, CNU Intern/GMR)

Ayuda sa Kapitolyo ipagamit sa sakto

Gusto ni Gobernador Gwendolyn Garcia nga magamit sa mga barangay ang P100,000 nga assistance sa probinsiya sa mga programa ug proyekto.

Matud sa gobernador nga andam ang Kapitolyo nga mopuno og assistance kun gikinahanglan gyud.

Ang kabahin sa socio-cultural, matud ni Garcia nga mamahimong ipasundayag sa barangay ang ilang ug dili lang sa pagpadisko matag piyesta.

Si Garcia nisugyot nga ibalik ang bayle panahon sa piyesta aron sab masayud ang kabatan-onan kung unsa ang mga naandan nga kinaraan apan nag-promote og kultura nga kalihukan.

“Ika-duha dunay mga barangay nga dunay festivals, ato gyud na i-encourage dili kay pataka lang og gasto sa kwarta, kinahanglan nihatag man tag kwarta gikan sa probinsiya kinahanglan dunay positive effect niana sa mga barangay, duna na tay tarung nga direction ug more than that when we celebrate our culture, we rekindle our Cebuano pride, pride of being a Cebuano,” dugang sa gobernador.

Gitataw hinoon ni Garcia nga wala niya gibawal ang diskoral apan matud niya nga kinahanglan nga dili kwarta sa probinsiya ang magamit alang niini. (/GMR)(BANATNEWS)