Duterte hagbong sa mga militante

CEBU, Philippines — Gidunganan og lihok protesta sa nagkalain-laing militanteng pundok ang ika-upat nga State of the Nation Address ni Presidente Rodrigo Duterte.

Nagtapok sila sa Fuente Osmeña Circle ug nag-martsa paingon sa dalan Colon, Siyudad sa Sugbo atubangan sa usa ka mall diin gipadayag ang ilang mga sentiment sa administrasyong Duterte.

Matud sa chairman sa Bagong Alyansang Makabayan (BAYAN)-Central Visayas, nga ang martsa gitawag og “United People’s SONA” diin matud pa ang tinuod nga kahimtang sa nasud maoy ilang ipakita. Sa maong kalihukan ilang gihagit ang katawhan sa pagdepensa sa nasudnong sobereniya ilabi na sa West Philippine Sea kay matud pa pakyas ang nasudnong kagamhanan sa pagdepensa sa teritoryo sa Pilipinas.

Laing isyu nga ilang gipadayag ang pagwagtang sa kontraktwalisasyon, ubos nga suhulan ug naghatag sab sila og alternatibong programa nga alang nila makatabang gyud aron sila makalingkawas sa kapobrehon.

Atol sa maong lihok protesta, nihatag og hagbong nga grado ang mga militanteng grupo sa Presidente.

Sumala pa ni Paglinawan nga palpak ang mga saad sa Presidente nga wagtangon ang kontraktwalisasyon samtang ubos ang sweldo ug taas ang buhis nga epekto sa Train Law. Ang lihok protesta gipahigayon sab sa ubang lugar sama sa Dumaguete City ug Probinsiya sa Bohol.

Uban sa BAYAN-Central Visayas sa kalihukan ang Pagkakasisa ng Samahan ng mga Tsuper at Operator Nationwide (PISTON) Cebu, urban poor, AMA Sugbo KMU, Anakbayan, Gabriela ug uban pa.

Human nakapadayag ang nagkalain-laing sektor sa ilang habig gisunog dayon nila ang effigy ni Duterte nga giingong tuta sa laing nasud sama sa Estados Unidos ug China. Samtang ginaug sa kapolisan ang alert status gikan sa red ngadto sa normal human sa SONA ni Duterte.

Matud sa direktor sa Police Regional Office-7 nga si Police Brigadier General Debold Sinas nga kagahapon sa buntag pa lang gisang-at na nila ang alert status.

Ilang giandaman ang mga lihok protesta sa mga militanteng grupo atubangan sa ilang kampo sa Camp Sergio Osmeña Sr. Mga sakop sa Civil Disturbance Management ang nag-atang atubangan sa kampo apan gilabyan ra kini sa mga militanteng grupo gikan sa Fuente Osmeña Circle lahos sa dalan Colon.

Ang maong lugar diin gipahigayon ang programa ang gibantayan sab sa kapolisan. - Jenny Luz Tejas ug Noreen Rose C. Vilchez (BANAT NEWS)