Padayon ang biyahe samtang Falcon gipangandaman

CEBU, Philippines — Normal pa ang biyahe sa mga barko nga molawig sa mga silingang  lalawigan sa Probinsya sa Sugbo bisan pa man sa mga nasinating pag-ulan-ulan.

Ang tigpamaba sa Philippine Coast Guard 7 nga si Lieutenant Junior Grade Michael John Encina miingon nga wala pa silay gipugngan karon nga mga biyahe hinungdan nga mahimo pang makalawig ang mga barko ngadto sa ilang mga destinasyon.

Dugang niini nga nagpadayon ang ilang monitoring sa lihok sa panahon ug mopagawas ra usab sila og mga pahibawo kon aduna unya silay pugngan nga mga biyahe.

Subay niini, mihimo og Pre-Disaster Risk Assessment ug Emergency Response Preparedness meeting ang Regional Disaster Risk Reduction Management Council isip pagpangandam sa Tropical Depression nga si “Falcon”.

Matud sa pangulo sa Disaster Risk Reduction and Management Division sa Office of the Civil Defense nga si Engr. Ver Niel Balaba nga ang matag rehiyonal nga ahensiya, motaho sa RDRRMC mahitungod sa ilang pagpangandam alang sa TD Falcon bisan og dili kini direktang makaapekto sa Sugbo.

“Everybody should be prepared to any eventualities like what number 1 kung mo-request og laing region nga affected ni Falcon some of the resources tawo or dili tawo would come from Region 7 so unsa man ng dili tao like family food pack, non-food items, aircraft, sea vessels ingon ana siya maoy ipadala in case lang moresponde ang region seven to regions nga maigo ni Falcon”, sigon ni Balaba. Mitambong sa maong kalihukan mao ang mga response cluster sa RDRRMC sama sa Philippine Coast Guard, Armed Forces of the Philippines, Bureau of Fire Protection, Philippine National Police ug PAGASA.

Lakip sa mitambong ang Mines and Geosciences Bureau aron mopagawas og updated nga lista sa mga landslide prone areas kon mobunok ang kusog nga uwan.

Anaa usab ang taga Department of Social Welfare and Development, Philippine Information Agency, Department of Energy ug mga representante sa Local Government Units sa mga siyudad sa Cebu, Mandaue ug Lapu-Lapu City. Mahinungdanon  ang ilang partisipasyon aron makita sa RDRRMC kon unsa ang ilang gihimo nga pagpangandam.

Gihimug-atan sab ni Engr. Balaba nga bisan og dili direktang maapektuhan ang Sugbo importante gihapon nga ang publiko magpakabana aron malikay sa dili maayong insidente. (BANAT NEWS)