Governor Garcia di kalimot sa 2012 standoff

CEBU, Philippines – Nagpasalamat si Gobernador Gwendolyn Garcia sa tanyag nga security detail nga ihatag sa Police Regional Office (PRO-7) apan dili niya makalimtan nga kausa sa iyang kinabuhi isip gobernador gihasi siya og mga polis aron siya pakanaugon sa pwesto pipila ka tuig na ang nakalabay.

Si Garcia nagkanayon wala siya’y problema bisan pa og wala siyay police details o police escorts. Wala hinuon ipahibalo kun pila ka polis ang ihatag nga pabantayon kang Garcia.

“I’m not very keen on people following me around. Pero it comes with position naay mga risgo involve. So I’m thankful for the security detail,” matud ni Garcia

Matud ni Garcia na-trauma siya sa ‘standoff’ ug dili kalimot sa nahitabo kaniya niadtong 2012 kun diin daghang mga polis ang miabot sa Kapitolyo sa dihang gobernador pa siya aron siya pugson sa pagpakanaog sa katungdanan.

“I had so much trauma during the time when this virtually became a garrison, when General (Marcelo) Garbo then sent legions to ‘secure’ but actually to manifest a show of force against me,” matud ni Garcia.

Niadtong Disyembre 2012, ubay ubay nga police ang gipabantay diha sa kapitolyo sa dihang si Garcia nagmagahi sa pagkanaog sa katungdanan bisan og nakapanumpa na isip acting-governor si kanhi bise gobernador Agnes Magpale  nga gihimo ni Ananias Villacorta, director sa Department of the Interior and Local Government regional office sa Cebu.

Si Garcia gisuspenso og unom ka buwan ni Presidente Benigno “Noynoy” Aquino tungod sa kasong administratiba nga gipasaka batok kaniya ni kanhi bise gobernador Gregorio Sanchez Jr. niadtong 2010 tungod sa alegasyon nga nisulod og mga anomalosong kontrata ang gobernador.

Ang Office of the President nakakita guilty sa grave abuse of authority si Garcia ug gipakanaog ang maong suspension.

Si Garcia midagan sa pagka-kongresista niadtong 2013 elections ug nakadaog  samtang si karon Bise Gobernador HIlario Davide III maoy nahimong gobernador ug nakadaog sab iyang pares nga si Magpale. (/IBM)(BANAT NEWS)