Nagmotor gipatay sa laing nagmotor

CEBU, Philippines — Patay ang usa ka lalaking nagmotorsiklo human siya gipusil sa laing mga wa ilhing lalaki nga nagsakay sab og motorsiklo diha sa South Road Properties (SRP) habig sa Barangay Cansojong, Dakbayan sa Talisay kagahapon sa buntag.

Ang biktima nailhan nga si Baby Ulin Labandero, 40, taga Barangay Labangon, Syudad sa Sugbo.

Paingon sa habagatan ang biktima ug gisundan kini sa mga mamumuno ug pag-abot sa nahisgutang lugar gitaparan kini sa mga mamumuno ug gipauwanan og mga bala. Nasukarap sa karsada ang biktima.

Usa ka impormante nitawag sa DYSS Super Radyo ug Banat News ug nitug-an nga nakakita kini sa panghitabo kay nagsunod siya sa biktima ug sa mga mamumuno hangtud na sa pagpusil niini.

Ang mga sakop sa Talisay Rescue Emergency Team (TREAT) nga unang nihiling sa biktima miingon nga wala na gyud kini kinabuhi. Duna kini samad pinusilan sa ubos nga bahin sa tuong dunggan.

Tulo ka kabhang wa pa matino nga bala ang nakita sa crime scene. Wala pay nakuhang kasayoran ang kapolisan sa motibo sa maong krimen. (/IBM)(BANATNEWS)