Good work LTO

Nindot kining gihimo ni Land Transportation Office (LTO) Chief Edgar Galvante nga abli ang mga Driver’s License Renewal Offices (DLRO) sa mga malls sa adlaw’ng Sabado, ingon man gitugotan na usab kini nga makaisyu og Student Driver’s Permit.

Siyaro, kadtong dunay mga trabaho makahigayon na gyud sa pagpa-renew sa ilang expired nga lisensya kay abli na man ang mga DLRO sa adlaw’ng Sabado. Unya, kadtong molukat og Student Permit, mahimo na sab diha sa mga mall.

Maayo man gyud sa mga mall kay bugnaw kun itandi nimo sa opisina sa LTO. Diha sa LTO-SM City; sa LTO-Mandaue sa JMall; LTO-Robinsons ug sa SM Seaside, pwerteng nindota lukatan og lisensya kay bugnaw.

Nahibaw-an nako nga daghan kaayong driver karon nga wala maka-renew sa ilang lisensya, ug peligro nga mamultahan og P5,000 ug dili pa tugotang ma-renew ang ilang lisensya sulod sa usa ka tuig kon madakpan.

* * *

May tigbasa sa Banat News nga mipadala nako og e-mail nga reaksiyon niya sa atong lindog sa miaging semana, ug mao kini:

“Sir dili gyud tinuod nga ang mga kawani sa Drug Testing Company sa Lapu-Lapu City maoy nag-fixer sa mga driver’s license unya mangayo’g mahal nga bayad.

“Nakadungog man ko sir dihang dunay nag-text sa usa ka radio announcer ug nipasangil nga nag-fixer ang mga kawani sa Drug Testing Center.

“Unfair kaayo nga sila pasanginlan sir. Ang tinuod, dunay mga fixer nga naglihok diha sa LTO sa Lapu-Lapu ug angay kini nga maoy sumpoon sa mga tinugyanan sa Land Transportation Office.”

* * *

Ang Cebu City Council mopasidungog ugma sa mga konsehal nga sulod sa milabay’ng tulo ka tuig nila nga pangatungdanan nakahimo og mga dalaygong binuhatan.

Ang mga dalaygong binuhatan sa mga konsehal nga pasidunggan ugma, naglakip sa mga wala g’yuy palta sa mga sesyon, labing daghan og napasaka nga mga ordinansa ug resolusyon.

Sa tanang 18 ka konsehal sa siyudad sa Sugbo, si Konsehal Sisinio Andales ra maoy bugtong sakop sa konseho nga wala gyuy palta sa tanang sesyon sa milabay’ng tulo ka tuig.

Si Konsehal Alvin Arcilla walay palta sa 2016, 2018 ug karong tuiga, apan nakapalta siya sa tuig 2017. Sila si Konsehal Pastor Alcover ug Joey Daluz adunay perfect nga attendance sa tuig lang nga 2016 ug 2017.

Unya, ang mga konsehal nga adunay labing daghan nga naaprobahan nga ordinansa mao si Andales, 12; Jun Gabuya, 15;  Margot Osme?a, 9; Joy Pesquera, 8; Dave Tumulak, 7; Joel Garganera, 6; Alvin Arcilla,3; Joy Young, 2; ug tagsa ka ordinansa ang napaaprobahan nila ni Alcover,  Daluz; Edu Rama; Philip Zafra ug Konsehal Mary Ann delos Santos.