Apo gilugos sa lolo

CEBU, Philippines — Naghiram karon sa selda ang 57 anyos nga apohan human kini gisumbong sa iyang 17 anyos nga apo nga mireklamong kini gilugos niini. Ang maong insidente nahitabo sa usa sa mga barangay sa lungsod sa Malabuyoc.

Gitago sa Banat News ang mga pangalan sa mga nalambigit aron sa pagprotekta sa menor de edad nga biktima. Ang gitumbok nga suspek lolo sa biktima, amahan sa iyang inahan.

Sigun pa ni Police Patrolman Abel Fuentes, desk officer sa Malabuyoc Police Station mireklamo sa ilang buhatan ang biktima inubanan sa iyang amahan.

Matud pa nga niadtong Biyernes sa gabii samtang naglakaw ang biktima pauli gikan nagsag-ob og tubig, kalit lang siya nga gibira sa suspek ngadto sa hilit nga lugar ug didto siya gipanamastamasan.

Butyag pa nga dili kini ang unang higayon nga gihilabtan siya sa iyang lolo kinsa ilaha rang silingan sa ilang dapit.

Matud pa nga niadtong Pebrero ning tuiga una siyang gihilabtan sa iyang lolo, apan wala siya misumbong tungod gihulga siya niini nga patyon ug apilon ang tibuok nilang pamilya.

Apan niadtong Biyernes wala na makaagwanta ang bata ug nisumbong na kini sa iyang amahan. Matud pa nga base sa medical examination report sa biktima nahilabtan gyud kini.

Dali nga gidakop ang gitudlong suspetsado didto ra sab sa iyang panimalay ug anaa na siya karon sa bilanggoan sa Malabuyoc Police Station aron pasakaan og kaso ugmang adlawa.(/IBM)(BANATNEWS)