Talisay na-scam sa Kapa?

CEBU, Philippines — Ang kagamhanan sa Dakbayan sa Talisay giingong na-scam sa grupong Kapa kinsa nagpahigayon og prayer meeting diha sa Talisay City Sports Complex sa Barangay Poblacion kagahapon.

Si Jeaneth Villagonzalo, executive director sa Talisay City Sports Commission nibutyag nga “Victorious Nissi” ang gigamit sa grupo sa pag-apply niini og permit ug wala nideklara nga Kapa kini.

Matud ni Villagonzalo nga ang Victorious Nissi usa ka tunghaan diha sa Barangay Mohon nga regular usab nga tiggamitan sa sports complex alang sa ilang kalihukan.

Hinuon gipasabot ni Villagonzalo nga wala silay problema sa grupo tungod kay ang ilang buhatan mopagamit man ni bisan kinsa sa sports complex basta aduna lang kini permit.

Ang maong grupo nibutang og tarpaulin nga adunay suwat nga “One Voice and One Heart. Ibalik ang Kapa.”

Atol sa pakigpulong sa tag-iya sa Victorious Nissi nga tunghaan nga si Dr. Rene Magdadaro kalit nga gilaksi ang tarpaulin nga ilang gibutang tungod kay gisuroy sila sa mga polis.

“Ganahan pa mo nga mobalik sa pagtanom og kamote? Kung wala ang Kapa mag-unsa ta”, ni Magdadaro pa.

Gibutyag ni Magdadaro nga sulod sa usa ka tuig na siya nga miyembro sa Kapa ug dako kini og ilang tunghaan.

Ang Kapa nihatag og 40 porsyento nga diskwento sa mga tinun-an alang sa ilang pagtungha. (BDB) (BANAT NEWS)