Polis sa cordova gibanhigan patay

CEBU, Philippines — Gibanhigan patay ang deputy chief sa Cordova Police Station sa may Barangay Poblacion sa maong lungsod kagahapon sa buntag.

Ang insidente nahitabo duol sa Cordova Central School, dili pa kaayo layo gikan sa estasyon sa kapolisan sa lungsod.

Ang biktima giila nga si Police Chief Master Sergeant Diogenes Carrillo kinsa nagmaneho sa iyang Toyota Hilux gikan sa duty pauli na sa ilaha sa Punta Engaño, Dakbayan sa Lapu-Lapu.

Giingong gisundan siya sa usa ka pares sa riding-in-tandem ug gipusil sa nagkadaiyang parte sa iyang lawas ug wala na kabawos og pusil si Carrillo.

Ang  duha ka wala hiilhing lalaki nga nagsakay og motorsiklo ang kalit lang nitumaw sa maong lugar ug ang backrider maoy nipusil sa makadaghang higayon sa biktima.

Walo ka kabhang sa kalibre .45 ang napalgan gawas sa sakyanan sa biktima.

Narekober sab sulod sa sakyanan sa biktima ang mga armas niini nga naglangkub sa usa ka kalibre .32; usa ka M16 ug ang police-issued firearm niini nga kalibre .45.

Ang tigpamaba ug hepe sa Investigation, Detection and Management Branch (IDMB) sa Cebu Provincial Police Office nga si Police Lieutenant Colonel Eloveo Marquez nagkanayon nga usa sa mga gitan-aw nila nga motibo mao ang pagkalambigit ni Carrillo sa drugas.

“Naa ni siya derogatory records kabahin sa illegal drugs mao nang reason nganong wala siya na-promote,” matud ni Marquez atol sa press conference kagahapon.

Unang nadestino si Carrillo sa Regional Intelligence Branch sa Police Regional Office-7 ug nabalhin sa Provincial Intelligence Branch sa CPPO, nabalhin na sa Naga City Police Station una pa nabalhin sa Cordova. Samtang ang hepe sa Cordova Police Station nga si Police Captain Efren Diaz nagkanayon nga wala silay namatikdan ni Carrillo nga nalambigit sa drugas.

Giingong nagnegosyo lang kini og lending sa mga tindahan duol sa ilang estasyonan.

“Wala man, nagpautang lang siya dito sa mga tindahan sa Cordova,” sigun ni Diaz.

Lakip sa gitan-aw nga motibo sa krimen ang maong negosyo ug ang anggulo sa pagpanimawos.

Butyag ni Diaz sa Banat News nga niadtong 2013, aksyong gibanhigan si Carrillo apan nakabawos siya ug nadakpan pa gyud ang suspek.

Nunot niini nagtuo ang kaubang polis nga posible sab nga gibalikan siya sa mga kauban sa iyang nadakpan.

Duda sab ang kaubanan nga aduna nay nadawat nga hulga sa iyang kinabuhi si Carrillo maong daghang armas ang dala niini sulod sa sakyanan.

“Maraming nakakita pero wala may gusto mag-witness, natakot sila,” dugang ni Diaz. (GMR) (BANAT NEWS)