Kontrabandong nasakmit, gipangguba
CEBU, Philippines — Gitabangan sa mga sakop sa Bureau of Jail Management ang Penology (BJMP) sa Mandaue City Jail sa pagdukdok gamit ang martilyo aron mapulpog ang kapin sa 60 ka nagdaiyang klase sa cellphone nga ilang nasakmit gikan sa mga binilanggo sa nahisgotang bilangguan.
Ang maong mga kontrabando nga naglakip sab sa mga sigarilyo ug lighter, nasakmit sa mga jail guard sukad pa niadtong buwan sa Enero 2019 diin ang uban nakuha gikan sa mga bisita nga nagtinguha sa pagpalusot niini.
Si MCJ warden Jail Senior Supt. Jessie Calumpang nga maoy nangulo sa maong kalihukan miingon nga gawas sa ilang mga nasakmit, adunay ubang kontrabando nga boluntaryong gitahan sa mga priso atol sa ilang gihimo nga mga Oplan Galugad ug dihang gitaud ang signal jammer nga gihatag sa Police Regional Office-7.
Nahibaw-an usab nila nga aduna mga cellphones ang ubang piniriso pinaagi sa mga concerned citizen nga mopadangat kanila og kasayuran. Samtang ang mga sigarilyo ug lighter, ilang nasakmit dihang ilang madiskubrehan nga ipasok kini sa mga dala sa mga bisita sa maong bilangguan. (BANAT NEWS)
- Latest
