Kooperatibang scam?

CEBU, Philippines – Tungod  sa mga kasikas bahin sa mga gipasanginlang mga investment scams, subling giablihan sa kapolisan ang kaso batok sa usa ka kooperatiba  nga una nang gireklamo sa mga miyembro niini tungod sa matud pa pagpangilad kanila.

Gikatakdang mopasaka og kaso nga estafa ang kapolisan batok sa mga nagpaluyo sa God The Father Credit Loan Cooperative nga nagbase sa Barangay Tisa, human gipasanginlan nga nangilad sa di momenos 30 ka residente sa maong dapit.

Matud pa nga ang kooperatiba misaad nga manghatag og gadgets paglabay sa usa ka buwan sa mga tawong mo-invest og kwarta.

Si Police Major Henrix Bancoleta, ang hepe sa Punta Princesa Police Station nga nahinabi sa Banat News miingon nga gireklamo sa mga tawo ang usa ka pastor nga giilang si Christopher Tundag  ug ang lead recruiter niini nga si Marjon Mainit.

Sa ilang pakisusi naporma ang maong kooperatiba sa miaging tuig apan wala lang abti ang tuig ila ng gitapos ang ilang operasyon.

Sigon ni Bancoleta, ang pamaagi sa maong kooperatiba ang pag-aghat og mga miyembro kliyente nga mo-down og kwarta depende sa gadget na ilang gusto.

Human sa usa ka buwan makuha na nila ang gadget nga ilang gusto.

“Ang ilang system is, mo-down ang kliyente og money depende sa value sa gadget nga iyang gusto, and after a month modawat na sila, pwede motor, or four-wheels,” asoy ni Bancoleta.

Ang kinadak-an nga nahatag sa kooperatiba sa usa sa ilang kliyente mao ang P400,000 isip hulip sa usa ka four-wheeled vehicle nga gusto unta niining maangkon human sa duha ka buwan.

Aduna say uban sa mga biktima ang nakadawat og bouncing checks human nga sila nireklamo ug gustong bawion ang kwartang ilang gi-invest sa kooperatiba.

Sumala pang Bancoleta ning buwan lang sa Abril nakamatikod ug nagduda ang mga miyembro nga ilad ang kooperatiba kay wala na mopakita kanila silang Tundag ug si Mainit dala ang ilang kwarta.

Matud pa nga ang maong kaso dugay na gyud unta naabot sa atensyon sa kapolisan apan karon lang bag-o nautingkay ug gibuhi pagbalik sa mga reklamante nunot sa kainit sa mga balita bahin sa mga investment scams.

Sa pagkakaron giawhag ni Bancoleta ang uban pang nabiktima nga moduol sa kapulisan aron makatabang pagpalig-on sa kaso.

Iyang advise mao paghipos sa mga dokumento sa transaction sa maong kooperatiba aron magsilbi kini nga ebidensya.

Si Bancoleta miingon nga ila na gipadala sa Criminal Investigation and Detection Group-7 ang kaso tungod kay sila maoy eksperto niini nga mga kaso.

Sa laing bahin, giangkon sa hepe sa Compostela police station nga naglisod sila pag-imbestigar sa pagtulis ug pagsunog sa KAPA Community Ministry Foundation.

Si Police Captain Ian Macatangay  miangkon nga naglisod sila paghipos og mga ebidensya ug mga testigos sa hitabo.

Apan matud niya persons of interest ang manager nga si Christopher Abad ug ang 21 ka stay-in employees. Nagduda sab siya sa nahitabo kaya ng pagtulis ug pagkasunog niini nahitabo usa ka adlaw human gianunsyo ni Pres. Duterte nga scam ang Kapa. (/IBM)(BANAT NEWS)