Mga pari ilahugay og parokya

CEBU, Philippines — Malaumon si Cebu Archbishop Jose Palma nga bukas ang kaparian sa pagdawat sa ilang mga bag-ong assignment karong hapon subay sa paglahugay og mga bag-ong parokya.

Matud sa Arsobispo nga excited na ang kaparian sa binalhinay kinsa dugay usab kini nga gipamalandungan ug giampoan ang pagtuon sa committee sa pagpahimutang kanila sa ilang bag-o nga assignment.

Ang pagbinalhinay giisip ni Palma nga usa ka pamaagi sa Ginoo ngadto sa mga pari sa pagserbisyo sa katawhan.

Gipasalamatan sab sa Arsobispo ang katawhan sa grabeng gipakita nga suporta ug pagpangga sa ilang kaparian sa ilang parokya.

Alang kang Fr. Alden John Baran sa Archdiocesan Shrine of San Roque – Mambaling, ang lahugay maghatag og kahigayunan sa kaparian sa pagpaambit sa ilang katakus sa pagpangalagad sa lain na sab nga pundok sa katawhan o parokya. (GMR) (BANAT NEWS)