Hazard reduction sa Sindulan nagpadayon

CEBU, Philippines – Ang Phase 1 sa Hazard Reduction Plan nga gihimo sa Apo Land and Quarry Corporation sa lugar diin nahitabo ang pagdahili sa yuta niadtong Septiyember 20, 2018 sa Sitio Sindulan, Barangay Tinaan, Dakbayan sa Naga, nagpadayon gihapon karon ug anaa na hapit sa siento porsyento basi sa  sugyot ug rekomendasyon sa mga eksperto.

Si Regional Director Efren Carido sa DENR-MGB7 atol sa gipahigayon nga AGIO Forum miingon nga basi sa rekomendasyon sa mga eksperto, kinahanglan kuhaon ang mga nagbitay nga debris isip kabahin sa Phase 1 sa Hazard Reduction Plan, ug kinahanglan usab ang pag-abli sa natabunan nga Pangdan River aron sa higayon nga moabot ang kusog nga ulan dili kini modahili ngadto sa mga lugar sa Naga.

Dugang pa ni Carido, padayon usab karon ang pagtanom og mga kawayan kilid sa sapa kay lawom-lawom ang mga gamot niini ug mahimo kining gamiton isip river bank stabilizer.

Sumala sa direktor nga kinahanglan anaay safety holes sa Sindulan ug adunay daku nga bungbong sa lugar aron kon adunay mahitabo nga pagdahili sa yuta dili na madali-dali kay aduna may makapugong.

Aduna say gihimo nga drainage system gikan sa taas nga bahin ngadto na sa constructed siltation.

Ang nahisgutang kompaniya maoy migasto sa pagtrabaho sa maong plano ug mosunod usab unya ang phase 2. (/DILT)(BANAT NEWS)