65 ka sakyanan ipanghatag sa Cebu City
CEBU, Philippines — Gikatakdang ihatag sa kagamhanan sa Dakbayan sa Sugbo ang 65 ka sakyanan ngadto sa mga barangay, Cebu City Police Office, Bureau of Jail Management and Penology-7 ug Bureau of Fire Protection-7.
Atol sa regular session niadtong Martes giaprobahan sa konseho sa dakbayan ang resolusyon nga giduso ni Konsehal Sisinio Andales ug Konsehal David Tumulak.
Ang nahisgutang resolusyon nagtugot kini kang outgoing mayor Tomas Osmeña nga mogama og deed of donation sa 18 ka sakyanan ngadto sa 13 ka barangay.
Ang mga barangay mao ang Zapatera nga adunay duha ka units, duha ka units sa Mabini, duha sa Talamban, tulo sa Tejero ug tagsa ka unit sa barangay sa Malubog, Pahina Central, Paril, Pit-os, Tinago, T. Padilla, Pulangbato, San Antonio, ug San Roque.
Niadtong niaging semana gi-aprobahan usab sa konseho sa dakbayan ang pagdonar sa 38 ka sakyanan ngadto sa 25 ka barangay.
Ang maong mga barangay gilangkuban sa Basak Pardo, Calamba, Guadalupe, Buhisan, Buot, Bulacao, Babag, Bonbon, Cogon Ramos, Carreta, Capitol Site, Camputhaw, Busay, Binaliw, Banilad, Apas, Agsungot, Day-as, Guba, Basak San Nicolas, Hipodromo, Lusaran, Kasambagan, Kalubihan ug Lahug.
Si Tumulak sa iyang bahin, maoy niduso sa resolusyon alang sa donasyon sa 42 ka sakyanan alang sa CCPO, usa ka ambulansiya alang sa BJMP-7 ug upat ka sakyanan alang sa BFP-7. (/BDB)(BANATNEWS)
- Latest