Tomas mag-atubang og daghang kaso
CEBU, Philippines – Mag-atubang og patong-patong nga mga kaso sa buhatan sa Ombudsman Visayas si Mayor Tomas Osmena human sa gihimong pag-imbargo niya sa motorsiklo sa polis nga sakop sa Criminal Investigation and Detection Group-7 (CIDG-7). Niadtong Martes sa hapon, gisang-at sa kapolisan ang siyam ka kasong kriminal ug upat ka kasong administratiba batok kang Osmeña.
Kini gihingusgan sa kadagkuan sa kapolisan isip pagpakita og suporta kang Patrolman Romil Gelogo, sakop sa CIDG-7.
Nasayran nga gikuha ni Osmeña ang Honda TMX 155 nga motorsiklo ni Gelogo dihang nagkasugat sila atubangan sa Camp Sotero Cabahug.Kahinumduman nga nangatarongan si Osmeña nga aduna siyay gahum nga mosita niini sanglit mayor siya sa siyudad.
Usa pa, matud niini nga walay mga side mirror ang motorsiklo, nag-short ug nag-tsinelas ra sab ang maong polis nga nagmaneho diin klaro kining kalapasan sa balaud. Sa habig sa polis, wala isyuhi og violation ticket ni Osmeña si Gelogo bisan pa man og gikuha na niini ang motorsiklo.
Lakip sa kasong kriminal mao ang Usurpation of Official function in relation to Article 14 and 15 ug Article 8, kini human nga mibarog si Osmeña isip awtorisadong tawo sa Land Transportation Office bisan og wala siyay deputization gikan sa maong buhatan.
Pasakaan sab si Osmeña og kalapasan sa Section 3 sa Republic Act 10883 o ang New Anti-Carnapping Act of 2016 gumikan sa pagkuha sa motorsiklo. Samtang kasong grave misconduct ug oppression ang mga kasong administratiba nga atubangon sa mayor.
Sa pagkakaron, walay ideya ang kapolisan kon asa gibutang sa mayor ang motorsiklo sa polis. (/DILT)(BANAT NEWS)
- Latest
