Mga botante papaulion og sayo

CEBU, Philippines – Giawhag sa kadagkuan sa Cebu South Bus Terminal (CSBT) ang mga botante kinsa mouli ngadto sa ilang mga lugar aron mobotar nga mosayo pag-uli ug dili magpaabot sa adlaw sa eleksiyon.

Si Jonathan “Joy” Tumulak, operations manager sa CSBT nibutyag nga walay nipasalig nga local government unit (LGU) nga mopadala og mga bus aron motabang og hakot sa mga pasahero.

Si Tumulak nagkanayon nga sa panahon sa tingsakay dako ang matabang sa mga bus paghakot og mga pasahero hilabina sa mga “priority passenger” sama sa mabdos, PWDs ug mga tigulang.

Matud ni Tumulak nga labing maayo kong ang mga pasahero nga wala nay trabaho o transaksiyon nga himuon sa Siyudad sa Sugbo mag-anam-anam na og biyahe karong adlawa hangtud sa Domingo.

Ang CSBT nangandam na kini daan sa pagdagsa sa mga pasahero karong weekend hilabina nga gipaabot nga mopauli ang kasagaran sa ilang tagsa-tagsa ka lungsod aron mobotar karong Lunes. (/BDB)(BANAT NEWS)