24 ka patrol cars gipanghatag
CEBU, Philippines — Nakadawat og bag-ong mga sakyanan ang kapolisan sa Lalawigan sa Sugbo human ang 24 ka mga patrol cars ang hingpit nang giturn-over sa kagamhanan sa probinsya ngadto sa nagkadaiyang police stations ug police units kagahapon.
Ang maong mga patrol cars maoy ikaduhang hugna sa mga sakyanan nga gihatag sa Kapitolyo.
Moabot ngadto sa P25.1 million ang pagpalit sa Kapitolyo sa maong mga patrol cars diin matag usa nagkantidad og P1.048 million.
Apil sa nahatagan sa maong mga sakyanan mao ang Provincial Mobile Force Company sa South ug North; headquarters sa Cebu Provincial Police Office, Regional Headquarters sa PNP ug mga police stations sa Madridejos, San Fernando, Dalaguete, Alcoy, Balamban, Pinamungajan, Asturias, Aloguinsan, Barili, Cordova, Borbon, Tabuelan, Bantayan, Sta. Fe, Danao, Tabogon, Tudela ug Toledo.
Si Police Col. Manuel Abrugena, hepe sa CPPO nagkanayon nga daku ang matabang sa maong mga sakyanan ngadto sa kapolisan sa lalawigan hilabina nga panahon karon sa eleksyon.
Magamit kini alang sa pag-secure sa mga lugar aron nga magpabilin ang hapsay ug malinawon ang adlaw sa piniliay. Misaad si Abrugena nga magpabilin nga neutral ug dili magpagamit o magpadala sa politika ang mga police sa probinsya.
Gawas sa mga patrol cars, apil usab nga giturn-over sa Kapitolyo ang pito ka mga coaster bus ngadto sa mga local government units. Apil sa nahatagan mao ang Cordova, Ronda, Poro, Ginatilan, Tudela, San Fernando ug Tabogon.
Matud sa taga Kapitolyo, mao kini ang mga lungsod nga wala pa mahatagi sa maong mga sakyanan. Matag usa ka coaster nagkantidad og P2.9 milyones. (BANAT NEWS)
- Latest
