No.4 wanted patay
CEBU, Philippines — Nalista sa ikaupat nga most wanted nga kriminal sa Dakbayan sa Talisay napatay sa kapulisan diha sa Sitio Lawis, Barangay Maghaway kagahapon sa 1:50 sa kaadlawon.
Ang napatay mao si Jackson Segundino, 35, nagpuyo sa maong lugar. Ang mga sakop ni Supt. Marlu Conag nagbitbit og duha ka warrant of arrests sa kasong murder batok ni Segundino. Apan sa dihang arestuhon na unta si Segundino gikatahong nibunot kini sa iyang rebolber dayong tion ngadto sa mga operatiba.
Dali ra sab kining naunhan sa mga otoridad hangtud nga ilang napatay ang suspek.
Nakuha sa crime scene ang .38 rebolber nga adunay usa ka bala nga wala makabuto ug tulo ka basiyo sa tambor niini.
Matud pa ni Conag nga notadong gun for hire ug tigbaligya og ilegal nga drugas ang ilang napatay.
Gani siya maoy gitumbok sa pagpusil patay sa tresurero sa Barangay Lawaan 3 niadtong miaging tuig.
Dugang pa ni Conag nga makadaghan na nilang gihimuan og operasyon si Segundino apan makasibat.
Ning higayona, nakorner ug nisukol hinungdan nga kini napusilan ug niresulta sa iyang kamatayon. (/IBM)(BANATNEWS)
- Latest
