Turismo sa Talisay palambuon

CEBU, Philippines – Dakong laraw sa kagamhanan sa siyudad sa Talisay nga mapalambo pa ang ilang turismo karong tuiga.

Kini maoy gibutyag ni Mikkie Aznar, community affairs officer ug kasamtangang Officer-In-Charge (OIC) sa tourism office sa syudad.

Si Aznar miingon nga naghinabi sila ni Mayor Eduardo Gullas ug ni kongresista Gerald Anthony “Samsam” Gullas labot sa ilang nindot nga tinguha.

Si Aznar maoy nagdala sa kinatibuk-ang pasundayag sa bag-o lang nahuman nga selebrasyon sa ika-74 ka tuig sa Takas sa Talisay, kagawasan sa Sugbu.

Siya nagkanayon nga kadtong ilang malampuson nga Takas sa Talisay maoy magsilbing sinugdanan sa ilang pagpalambo sa turismo ilabi na sa Barangay Poblacion nga maoy sentro.

Sa umaabot nga katuigan, posible nga magkanindot na unya ang ilang mga aktibidades nga makapaagni pa og mga turista.

Ang turismo mao sab ang dakong laraw sa batan-ong Gullas nga nagpapili pagkamayor sa syudad. —/LPM (BANAT NEWS)