Earth Hour himuon karong Sabado
CEBU, Philippines – Ang Cebu City Environment and Natural Resources Office (CCENRO) miawhag sa mga residente sa pag-obserbar sa Earth Hour pinaagi sa pagpawong sa ilang linya sa kuryente sulod sa usa ka oras karong Marso 30, adlaw’ng Sabado. Matud ni Nida Cabrera, pangulo sa CCENRO nga ang pagpakigbatok sa climate change dili lang responsibilidad sa mga concerned offices apan apil na ang publiko.
Ang Earth Hour usa ka tinuig nga kalihukan diin ang government offices ug Non-Governmental Organization (NGOs) nag-organisar og kalihukan aron sa pagpahibawo sa katawhan sa pamaagi pagtubag sa hulga sa global warming. Dugang ni Cabrera, panawagan sab kini sa publiko nga mahimong environmental conscious pinaagi sa pag-reduce og carbon emission sa palibot.
Adunay giandam nga kalihukan ang CCENRO sa Plaza Independencia unyang Sabado sa gabii nga tambungan sa nagkalain-laing organisasyon.
Sugdan ang programa pinaagi sa pagpawong sa suga sulod sa usa ka oras ug adunay himuong night bike ride.
Subay niini, si Cabrera midugang nga adunay nagpadayon nga pagtuon alang sa pagbutang unya og bike lanes sa siyudad hinungdan nga sa sayo pa lang giawhag na niini ang mga trabahante nga mag-bike paingon sa ilang trabahoan. (/DILT)(BANAT NEWS)
- Latest