Kaso sa rabies gitinguha nga mamenusan
CEBU, Philippines — Karong panahon sa ting-init, ang Department of Veterinary Medicine and Fisheries (DVMF) subsob ang gihimong pamaagi aron malikayan nga daghan ang mapaakan og iro.
Ang pangulo sa DVMF nga si Dr. Alice Utlang miingon nga niadtong Hulyo 2016 ang Cebu City nabutang sa ikalimang pwesto nga adunay daghang kaso sa rabies sa iro.
Subay niini ang Humane Society International mihimo og survey kon pila ang populasyon sa iro sa siyudad ug ilang nahibaw-an nganong daghan gihapon ang kaso sa rabies bisan og namakuna na ang DVMF. Nasuta nga wala mabakunahi ang 70 ngadto sa 80 porsiyento nga tinud-anay nga populasyon sa iro sa dakbayan.
Human nila masayri ang sitwasyon, nangayo ang DVMF og bakuna sa Bureau of Animal Industry ug nahatagan sila og 150 mil. Dihang nadawat ang bakuna niadtong 2017, ang DVMF nag-house-to-house sa pagbakuna sa iro niadtong miaging tuig. Niadtong 2017, anaa sa ika-duhang pwesto ang Cebu City sa mga siyudad nga daghan og kaso sa rabies, apan gumikan sa ilang gihimo sa miaging tuig, anaa na kini karon sa ika-walo nga pwesto lukop nasud. (/DILT)(BANATNEWS)
- Latest