Kapin P9 milyones shabu sakmit

CEBU, Philippines – Mokabat sa P10 milyones nga kantidad sa ginadiling drugas ang nasakmit atol sa managlahing operasyon sa kapolisan sa Dakbayan sa Sugbo ug Danao.

Mobalor sa P9 milyones ang kantidad sa ilegal nga drugas ang nasakmit sa tulo ka buwag nga buy-bust operation sa Dakbayan sa Sugbo sugod niadtong Martes sa gabii hangtud kagahapon sa kadlawon. Niadtong Martes sa gabii, diha block 4, Barangay Sawang Calero, Dakbayan sa Sugbo nasikop si Jonmarc Cardenas alyas “JM”, 19, residente sa maong barangay ug giingong nakuhaan kini og usa ka pouch nga adunay sulod nga pito ka dagkong plastik nga shabu nga nitambang ngadto sa 200 gramos ug mobalor tanan ngadto sa P1,360,000.

Samtang diha sa dalan C. Padilla, Barangay San Nicolas proper, Dakbayan sa Sugbo nadakpan ang uyoan ni Cardenas nga si Joselyndro Cardenas Getaruelas, 19, residente sa dalan Tupaz, Barangay Sawang Calero, sa maong siyudad.

Gawas sa duha ka gagmay’ng pakete nga shabu nga napalit atol sa buy bust giingong nakuhaan usab kini og dugang lima ka medium nga pakete nga shabu nga motimbang tanan ngadto sa 25 gramos ug mobalor ngadto sa P170 mil.

Kagahapon sa kaadlawon, nadakpan diha sa Sitio Banilad, Barangay si Vanessa Lauron, 24-anyos, residente sa Sitio Ponce 1, Barangay Carreta, Dakbayan sa Sugbo. Giingong nakuha gikan kang Lauron ang binultong shabu nga motimbang ngadto sa usa ka kilo ug 35 ka gramos ug mobalor kini ngadto sa P7,031,200. Samtang, napulo ka tawo ang nasikop atol sa pagronda sa kapolisan usa ka balay nga gikatahong gihimong suyopanan diha sa Barangay Tejero, Dakbayan sa Sugbo kagahapon sa udto.

Giingong si Cecilia Rosales, 46, ang nagpadagan sa maong drug den samtang ang subject sa buy-bust mao sila si Orlando Tagud alyas “Buding”, 52 ug Rogelio Jimbol Cuico, 39 ug nasakmit gikan kang Tagud ug Cuico ang 47 ka mga pakete nga shabu nga motimbang tanan og 15 gramos ug mokantidad ngadto sa P102 mil. Lakip sa mga nadakpan kinsa nibisita sa maong drug den mao sila si Liezel Lipithen, 19; Michael Malazarte, 38; Michael Oporto, 37; Stuwart Pason, 30; Arnel Gonzaga, 28; Romeo  Bayo, 52; ug Benjamen Bardon, 37.

Sa laing bahin, mokabat sa P500,000 ang kantidad sa shabu nga nasakmit usab atol sa buy-bust sa kapolisan kagahapon sa kadlawon diha sa Barangay Guinsay, Dakbayan sa Danao.

Nasikop sila si Marbella Lapiña, 40, minyo, nagpuyo sa maong barangay ug iyang kauban nga si Tomas, Ramonida, 42, ulitawo, taga Barangay Suba  sa maong dakbayan.  Giingong nakuha gikan sa posisyon sa mga suspetsado ang usa ka medium nga putos sa shabu nga motimbang ngato sa 75 gramos.

Laing duha usab ang nasikop sa kapolisan sa mao gihapong dakbayan diha sa Barangay Maslog kagahapon sa kadlawon nga sila si Raymart Calzada, 27, ulitawo, taga Barangay Guinsay ug Juanito Herrera, 42, ulitawo, taga Barangay Nangka, Consolacion.

Nakuha gikan sa duha ang 55 gramos nga shabu nga nagkatidad tanan og P374 mil, ug .357 revolber nga adunay. (Rowena D. Capistrano ug  Romeo  T. Limpangog/BDB)(BANAT NEWS)