Unlimited nga pagsakay sa ferry boat gitanyag

CEBU, Philippines – Gihatagan karon og sulbad sa Topline Express Ferry sa  Dakbayan sa Lapu-Lapu ang dinalian nga pagbiyahe sa ilang mga pasahero nga gikan sa pier area sa Dakbayan sa Sugbo paingon sa Lapu-Lapu.

Si Brigitte Carmel Mueller nga maoy vice-president for operation sa maong kompaniya miingon nga ang ilang gitanyag nga pagsulbad aron dali ang pagbiyahe mao ang paghatag nila ngadto sa mga pasahero og unlimited ferry ride pinaagi sa ilang mga top card. Ang maong top card nga alang sa mga lokal ug langyaw nga mga pasahero, nahisama kini og ATM card ug butangan kini og load sa pasahero.

Si Ritchy Enabacan, ang operation manager sa Topline Express Ferry miingon nga ilang gihimo ang labing sayon nga pamaagi alang sa paspas nga pagbiyahe sa mga pasahero.

Gitataw ni Enabacan nga ang maong card ilang giisip nga labing dali nga pamaagi sa pagsakay sa pasahero kay wala nay daghang proseso.

Igo lang itapion sa machine nga anaa ipahimutang sa ganghaan sa ferry boat ang card.

Dugang ni Enabacan nga kasamtangang dos mil ang gidaghanon sa mga pasahero ang mosakay sa ilang ferry boat gikan sa wharf sa Dakbayan sa Lapu-Lapu paingon usab sa pantalan sa Dakbayan sa Sugbo. (/DILT)(BANAT NEWS)