Human trafficker 15 tuig mapriso

CEBU, Philippines – Mabilanggo sulod sa 15 ka tuig ang usa ka 21-anyos nga babaye nga online trafficker human kini ni plead guilty sa kasong attempted trafficking in person atol sa pagsugod sa husay sa iyang kaso diha sa sala  ni Judge Ramon Daomilas Jr. sa Cebu City Regional Trial Court Branch 11niadtong Miyerkules sa hapon.

Ang Branch 11 maoy gitudlong Cybercrime Court sa Rehiyon 7. Ang maong babaye nadakpan niadtong Abril 23 sa nilabay nga tuig sa panimalay niini sa lungsod sa Cordova, atol sa entrapment operation sa Women and Children Protection Center.

Ang maong babaye niabuso sa tulo ka mga batang babaye, nagpangidaron 6, 9, ug 11 anyos diin usa niini iyahang pag-umangkon.

Gawas sa 15 ka tuig nga pagkabilanggo pabayaron kini og tunga sa milyon ug P100 mil nga exemplary damages.

Matud pa ni Atty. John Tanagho, International Justice Mission-Cebu Field Office Director, ang pagpahigayon og rescue operations makapahunongi sa pagpangabuso sa mga bata.

Ang pagpasaka og kaso mao ang paghatag og hustisya ngadto sa mga biktima ug magsilbi usab kining pamaagi aron paspas nga makapahupay sa kasingkasing sa mga survivors.

Ang maong desisyon gihangop ni Cordova Mayor Mary Therese Sitoy-Cho. Matud niya  dili rason ang kakabus aron mohimo sa maong salaod. (/IBM)(BANAT NEWS)