Upat ka SK officials positibo sa druga

CEBU, Philippines – Duha ka mga Sangguniang Kabataan (SK) chairman ug duha ka SK councilors ang nagpositibo sa drug test nga gipahigayon sa Cebu Provincial Anti-Drug Abuse Office (CPADAO).

Ang usa ka SK chairman gikan kini sa lungsod sa Oslob samtang usa gikan sa dakbayan sa Danao. Samtang ang duha ka SK councilors gikan sa Danao ug lungsod sa Carmen.

Gawas sa maong mga SK officials, duha usab ka barangay tanod sa Danao ug duha ka job orders sa Sogod ang nagpositibo sa drug test.

Wala usa gibutyag kun taga asa nga barangay ang maong mga SK officials tungod sa confidentiality.

Matud ni Ivy Durano - Meca ang pangulo sa CPADAO nga ang mga nagpositibo sa drug test niangkon sa ilang paggamit sa illegal nga drugas ug nasuta nga “low risk” lang sila nga users.

“These SK officials underwent assessment on the degree of their addiction, mostly of them voluntary submit themselves for treatment and rehabilitation program,” matud ni Meca.

Naalarma usab ang CPADAO sa resulta sa drug test tungod kay kasagaran sa nagpositibo mga SK officials. Ang resulta sa initial screening ipaubos pa sa confirmatory test.

Plano sa CPADAO nga makigalayon sa SK Federation sa probinsya sa Sugbo alang sa mga programa nga ipatuman sa mg opisyal sa SK.

Si Atty. Jerome Brillantes ang provincial director sa DILG nagkanayon nga maghulat sila sa resulta sa confirmatory test. Kun mapamatud-ang nigamit gyud og illegal nga drugas ang maong mga opisyales magatubang sila og kaso. Ang CPADAO nilusad og screening sa mga opisyales sa barangay ug munisipyo sa Asturias, Consolacion, Oslob, Danao, Carcar, Naga, Sogod ug Carmen.

Apil usab nga gipahigayonan og drug test ang 30 ka empleyado sa Provincial Planning and Development Officer ug Cebu Provincial Investment and Promotion Office kon diin nag negatibo ang resulta.

Suma-total moabot sa 1, 171 ang ma-screen sa CPADAO sa tibook bulan sa Pebrero hangtod sa Marso 4.

Samtang ang Commission on Youth sa Archdiocese of Cebu nasagmuyo bahin sa mga SK officials nga nagpositibo sa drug tests. Matud pa ni Frankel Gerard Margallo, nasagmuyo siya sa maong balita kay matud niya isip SK officials sila untay modelo sa katarong sa mga kabataan ug tungod sa ilang gibuhat dili lang ilang kaugalingon ilang giguba kondili lakip ilang pamilya.

Apan siya nagtuong may paglaom pa ang mga kabataang naulipon sa ginadili nga drugas pinaagi sa pag rehabilitate kanila ug sila angay nga i-ampo. (Rowena Capistrano/IBM)(BANAT NEWS)