3 ka tinun-an nakuhaan og P2.3 milyones shabu
CEBU, Philippines — Tulo ka tinun-an lakip ang usa ka minor de edad ang nasikop sa buy-bust operation sa Philippine Drug Enforcement Agency RO-7 ubos sa pagpangulo ni Regional Director Wardley Getalla ug Lapu-Lapu City Police Office-CIB nga gipangulohan ni Police Capt. Genesis Aniversario sa may Barangay Pusok Lapu-Lapu City niadtong Domingo sa hapon.
Ang mga nasikop mao sila si John Peppard Beltran, 21, Mhar Abarri, 21 anyos ug 16 anyos nga lalaki ug nakuhaan og lima ka putos nga gituohang shabu nga mobalor og P2.38 milyones.
Samtang nadakpan sila si Ronilo Binarao, 38, ug Roberto Abasolo, 40 , nga nakuhaan og tunga sa milyon sa gituohang shabu diha sa Barangay Lawaan 2, Dakbayan sa Talisay sa samang adlaw.
Ang operasyon gipangulohan ni Police Major Ardeolito Cabagnot. Matud ni Cabagnot, si Abasolo nadakpan na kaniadto apan nakapiyansa samtang si Binarao bag-o lang sa ilegal nga negosyo.
Si Archbishop Jose Palma sa Archdiocese of Cebu namahayag nga nasubo kini tungod kay bisan pa sa hugot nga kampanya kontra ilegal nga drugas daghan gihapon ang supply niini.
Gidayeg hinuon niya ang kapolisan nga nakasakmit sa P190 milyones nga balor sa drugas sa duha ka operasyon sa Dakbayan sa Sugbo ug Lungsod sa Consolacion adlaw nga Domingo.
Samtang kagahapon sa buntag gitigum ni Mayor Teresa “Nene” Alegado, ang mga kapitan sa lungsod ug nimando nga pahugtan ang monitoring sa kabarangayan ug sugdan sa purok ang profiling sa mga nagpuyo sa ilang dapit.
Si Alegado nakurat nga adunay ingon niadto kadaghan nga ilegal nga drugas nga nakuha sa ilang lungsod. (BANAT NEWS)
- Latest
