Peter Lim pabiling idlas

CEBU, Philippines – Ang Philippine Drug Enforcement Agency-7 ug ang Police Regional Office-7, padayong nagmonitor sa nahimutangan sa magpapatigayon nga si Peter Lim.

Matud ni PDEA-7 regional director Wardley Getalla nga sa pagkakaron nagpadayon ang ilang monitoring sa nahimutangan ni Lim ug iyang giangkon nga naglisod sila sa pagpangita niini ilabi na nga kuwang ang ilang sakup ug ang mga lugar nga ilang maadtuan.

Sumala sa ilang monitoring nga gihimo sa katapusan sa miaging tuiga, wala si Lim sa Sugbo, tungod sa pagbalhin-balhin niini og lugar. Hinungdan nga padayon ang ilang pakig-alayon sa uban ahensiya sa gobyerno kon asa kini karon nagtago-tago.

Awhag ni Getalla sa komunidad nga motabang kanila pinaagi sa paghatag og impormasyon ngadto sa awtoridad kon adunay nahibaw-an kun asa nahimutang si Lim ug sa ubang tawo nga nalambigit sa ilegal nga kalihukan. Samtang si PSupt. Ma. Aurora Rayos, information officer sa PRO-7 mitug-an nga sa pagkakaron, wala usab silang update sa nahimutangan ni Lim ug subject pa usab kini sa monitoring sa ilang intelligence group.

Kahinumduman nga si Lim, ginganlan ni Presidente Rodrigo Duterte nga nalambigit sa pagpayuhot og ilegal nga drugas ug uban pang mga ilegal nga kalihukan. (/DILT)(BANAT NEWS)