Dul-an P800,000 drugas nasakmit

CEBU, Philippines — Dul-an sa P800,000 kantidad sa ilegal nga drugas ang nasakmit sa kapolisan sa managlahing operasyon sa syudad sa Sugbo.

Ang unang operasyon nahitabo niadtong Biyernes diha sa C.Padilla street sa Barangay Duljo Fatima nga gipangulohan ni City Mobile Force Company Police Chief Inspector Chuck Barandog ug mga sakop sa PDEA.

Ang nasikop mao sila si Rickie Rivas, alyas Rickie, 40 anyos, ug Child Jay Cabellon.

Si Rivas, kanhi napriso, ug Cabellon pulos street level target apan wala malakip sa Itug-an ni CD List.

Nasakmit gikan sa maong mga dinakpan ang mga pinutos sa ginadili nga drugas nga motimbang ug 75 gramos nga mobalor ug P510,000  base sa Dangerous Drug Board Value, buy-bust Money, ug sudlanan sa ilegal nga drugas.

Ikaduhang operation nahitabo alas sais sa gabie sa may Ma. Gochan Street, Barangay Mambaling, diin nasikop sa Police Station 11 Drug Enforcement Unit mao si Limuel Canizares alyas Paping, 28 anyos, ulitawo ug residente sa maong lugar.

Nasakmit gikan kang Canizares mao ang mga pinutos sa ginadili nga drugas nga motimbang og 25.78 grams nga mobalor og dul-an sa P176,000.

Katapusan operation nahitabo sa may Villagonzalo 2 sa Barangay Tejero, diin nasikop sila si Alejandro Gallado, 64 anyos, Reymar Cruda, 20 anyos, Chino Tamboog, 19 anyos, Joseph Saquin, 28 anyos,Dexter Tumulak, 25 anyos, Juril Durog, 24 anyos; Nenalyn Caballero, 30  anyos, Jenny Catalan, 21 anyos; Ricardo Colegado, 38 anyos, ug  Charlie Erato, 20 anyos.

Nangulo sa maong operation mao si Police Senior Inspector Joemar Pomarejos, hepe sa Waterfront Police Station, diin nasakmit gikan sa mga dinakpan ang mga pinutos sa ginadili nga drugas nga mobalor ug dul-an sa P11,000.

Ang mga dinakpan nagtingkagol na karon sa lock-up jail ug gipaabot ang pagpasang-at ug tukma nga kaso.  —/LPM (BANATNEWS)