CT-TODA mihangyo nga maka-isyu og TOP
CEBU, Philippines — Limpyohan gyud sa mga sakop sa City of Talisay-Traffic Operation Development Authority (CT-TODA) ang Brgy. Tabunok nga maoy reklamohan sa mga motorista sa pagkatanggong nila sa trapiko, kini ang panganti ni Rogelio Villaver, pangu sa CT-TODA.
Apan si Villaver mihangyo sa tanan nga unta mo-kooperar sa ipatuman nilang lagda sa trapiko.
Kini nagkanayon nga dili nila kini mahimo nga sila lang kay ang suliran sa trapiko anaa gyud kini sa tanan ilabi na pagdisiplina sa kaugalingon.
Sa nasayran, niabot na sa kapin usa ka libo ang ilang naisyuhan og citation ticket apan ang uban nga badlungong motorista kataw-an lang ang ilang iisyu kay lagi barato raman ang pagbayad sa penalty.
Tinguha unta ni Villaver nga bisan usa o duha kanila sa CT-TODA ang maka-isyu og Temporary Operators Permit (TOP) aron magkinto na gyud ang motorista kay ang bayad sa TOP magsugod man sa 1,500 pesos.
Giangkon niini nga daghan gyud kaayo ang nag-abusar karong panahona mao nga hangyuon niya ang Land Transportation Office (LTO) kabahin niini.
Gawas pa sa mga abusadong motorist, daghan sab kaayo ang mga kolorum nga mga sakyanan sa Talisay.
Siya nagtuo nga pinaagi sa TOP makaamgo gyud ang mga drayber nga motuman sa ilang mga lagda. (BANAT NEWS)
- Latest
