Kaso sa dengue misaka

CEBU, Philippines – Misaka ang gidaghanon sa mga nangamatay tungod sa sakit nga dengue karong bulana kun itandi sa samang bulan sa miaging tuig, dungan usab niini ang pagsaka sa gidaghanon sa mga nasakit niini.

Ang Department of Health 7 (DOH-7) miingon nga 14 ang namatay karong tuiga sa wala pa natapos ang bulan sa Enero itandi sa upat lang ka kaso sa miaging tuig sa samang buwan.

Karong lang buwan sa Enero nakatala sila og 1,657 ka mga kaso sa dengue tibuok rehiyon nga 147 porsiyento ang pagsaka itandi sa 670 ka kaso gikan Enero 1 hangtod Enero 26 sa miagingt tuig.

Base sa datos sa DOH-7 karong tuiga ang  kinadaghanan og kaso nga natala sa mga nag-edad 6 hangtod 10 anyos.

Ang Dakbayan sa Lapu-Lapu ang kinadaghanan sa ilang 171 ka kaso apan  walay namatay. Sa miaging tuig adunay 56 ka kaso ug usa ang namatay sa maong siyudad sa samang buwan (Enero).

Gisundan kini sa Dakbayan sa Sugbo nga adunay 127 ka kaso apan duha  ang namatay. Itandi sa miaging tuig adunay 129 ka kaso ug walay namatay.

Sa Dakbayan sa Mandaue adunay 89 ka kaso ug usa ang namatay samtang 49 ka kaso ug walay namatay sa miaging tuig.

Sa Dakbayan sa Dumaguete adunay 59 ka kaso ug usa ang namatay. Sa miaging tuig sa bulan gihapon sa Enero adunay 17 ka kaso ug walay namatay.

Sa Dakbayan sa Toledo adunay 41 ka kaso ug usa ang namatay apan sa miaging tuig adunay 22 ka kaso ug walay namatay.

Sa Rehiyon-7 gikan Enero 1 hangtod Enero 26 ning tuiga, nag-una ang Sugbo nga adunay kinadaghanan og namatay ug 11 ang nakalas, gisundan sa duha sa Bohol  ug usa sa Negros Oriental.

Si Dr. Ronald Jarvik Buscato, Medical Officer III sa DOH-7 nagkanayon nga sa Pilipinas motaas ang kaso sa dengue kada tulo ka tuig.

Aduna silay teyoriya nga may kalabotan kini sa kinaiya sa lamok nga Aedes Egypti ug Aedes Albopictus ug ang pag-usab sa kaisugon sa dengue virus. Apan wala pa nila kini makompirmar pinaagi sa siyensiya.

Matud niya, epektibong pangkontra sa maong sakit ang kanunay nga paglimpyo sa palibot. Ang programang  4S o search and destroy breeding places, secure self-production, seek early consultation ug support fogging/spraying makapakgang sa pagsanay sa lamok.

“Walay mas epektibo nga vector control method or intervention other than search and destroy, mao gyud na siya ang pinaka-effective, ang search and the destruction of mosquito breeding sites,” sumala pa ni Buscato.

Matud niya kinahanglan lang gyud mokooperar ang komunidad batok sa dengue. (/IBM)(BANAT NEWS)