Mayor Reluya dili mosibog

CEBU, Philippines — Mitingog na si San Fernando Mayor Lakambini “Neneth” Reluya pipila ka adlaw human sa makalilisang nga hitabo sa iyang pamilya dihang sila gibanhigan diha sa Barangay Linao, sa Dakbayan sa Talisay niadtong Enero 22.

Si Reluya sa iyang gipagawas nga pamahayag nagpasalamat sa Malacañang ug Department of Interior and Local Government, League of Municipalities of the Philippines, national  ug local officials nga nikondenar sa nahitabong pagbanhig kanila.

Mapasalamaton usab siya sa katawhan sa Lungsod sa san Fernando nga nipakita sa ilang suporta ug pagtuaw sa pagpangita’g hustisya.

Matud niya, dako iyang pasalamat sa Labaw nga Makagagahum sa paghatag kaniya ug ikaduhang kinabuhi.

Nakalas sa maong ambush ang iyang bana nga si ABC Presidente Ricardo “Nonoy” Reluya Jr. ug ang drayber nga si Allan Bayot ug ang staff ni mayora nga si Ricky Monterona.

Nanawagan siya sa Special Investigation Task Group Reluya nga motuman sa direktiba nga gihatag ni PNP Chief Oscar Albayalde sa pagsulbad sa krimen ug ilhon ang mga nagpaluyo niini sulod sa duha ka semana.

Giawhag usab niya ang National Bureau of Investigation nga mohimo usab ug parallel investigation.

Matud niya ang gipakitang suporta ug simpatiya sa katilingban kanila nakapahupay sa kasakit nga giatubang ug naghatag kaniya og kusog nga mopadayon sa iyang pagpapili pagusab sa lungsod.

Gawas sa politika nga anggulo nga maoy gituohan ni Reluya, gitan-aw usab sa kapolisan ang negosyo sa mayor.

“Usa siya ka negosyante pud, plus sa politics kay duol na ang election and siya maoy incumbent mayor sa San Fernando,”ang tigpamaba sa Special Investigation Task Group - Reluya nga si Police Superintendent Virgilio Bayon-on miingon. (BANAT NEWS)