Tanod nga aktibo kontra drugas gipatay

CEBU, Philippines – Patay ang usa ka barangay tanod sa Barangay Tanke  sa Dakbayan sa Talisay human kini gipusil sa wa ilhing mamumuno diha sa Sitio Kimba, Barangay San Roque sa mao gihapong dakbayan niadtong Miyerkules sa alas 11:25 sa gabii. Ang biktima giingong aktibo sa kampanya kontra ilegal nga drugas.

Ang biktima nailhan nga si Lyndie Belila, 36, kinsa nakaangkon og daghang samad pinusilan sa iyang kalawasan. Samtang napagan ug naigo sa tuo nga paa ang gwardya nga si Darios Bonghanoy, 47, nga naatol sa paglabay niini diha sa nahitaboan.

Matud pa ni Supt. Marlu Conag, pangu sa kapulisan sa Syudad sa Talisay nagsakay sa iyang motorsiklo ang biktima nga gisundan og puti nga van.

Wala pa usab matino kun may koneksyon sa pagpatay sa barangay kapitan sa San Fernando ang maong puti nga van.

Pag-abot sa nahisgutang lugar gipauwanan ang biktima og mga bala hangtud nga nasukarap sa karsada. Gidala sa tambalanan ang biktima apan gideklarar kini nga dead on arrival.

Ang mga nirespondeng polis nakarekuber og basiyo sa M16 nga armas ug .9mm.

Samtang nakuhaan usab og .45 nga armas nga adunay pito ka buhing bala sa magazine ang biktima nga gisuksok sa iyang hawak ingon man .9mm nga armas nga adunay daghan mga bala nga naa sulod sa iyang sling bag.

Asoy pa ni Conag nga ilang gitutokan nga motibo sa krimen mao ang pagka aktibo sa namatay sa kampanya batok sa ilegal nga drugas. Siya nagkanayon nga matag operasyon sa mga sakop sa kapulisan sa Barangay Tanke naa si Belila.

Dugang pa ni Conag nga posible nga mga ilegalista ang nagpatay sa biktima tungod kay susama naman nga siya maoy police informant sa kapolisan.

“On going pa ang progress report, siguro may threat na siya sa buhay niya kaya medyo uneasy siya. First, before nakita ko siya once or twice sa station parang naka bonnet, nagtatakip kasi ng mukha. Kasi uneasy siya, parang may kinatakutan, kasama niya yung ibang tanod kasi nagka-conduct sila ng operation kasama ng mga pulis. Baka may mga kilala siya o kalaban na drug personality na sasabihin na kasi kasama siya sa operation ng PNP,” matud ni Conag.

Hinuon si Conag nitataw nga ila pa sab nga palawman ang ilang imbestigasyon kun unsa sab ang background gyud sa biktima ingon man kun nganong nagdala kini og mga armas. (Nichole Alexis A. Abas/IBM)(BANAT NEWS)