Talisay Police pa praktison – paggamit og pusil ni Gullas

CEBU, Philippines — Gusto ni Mayor Eduardo Gullas nga regular nga magbansay ang kapolisan sa Siyudad sa Talisay sa pagpabuto sa ilang armas.

Matud ni Mayor Gullas nga dili lalim ang trabaho sa kapolisan ilabi na karong panahon sa kampanya batok sa ginadiling drugas.

“Mas maayo nang sige og practice kay sa wala gyud makapabuto sa ilang pusil,” asoy pa ni Gullas.

Usa sa mga babag nga dili makabansay ang kapolisan sa shooting mao ang kakuwang nila sa bala.

Hinungdan nga si Gullas miingon nga iyang pangitaan og paagi nga makatampo sa paghatag og bala alang sa pagbansay sa kapolisan sa dakbayan.

Adunay pipila ka mga kagamitan sa kapolisan nga iyang nahatag apan aduna pa sab ang wala gumikan sa kakuwang sa ilang pundo.

Hinuon siya miklaro nga kon masigo ra sa ilang pundo dili gyud kini niya ihikaw ngadto sa kapolisan nga maoy tigpatuman sa balaud.

Iya sab nga gipahinumduman ang bagito nga kapolisan nga hatagan og dungog ang ilang uniporme ug dili abusaran. (BANAT NEWS)