Mga pushers sa Talisay nanaghan

CEBU, Philippines — Giangkon sa kapulisan sa Probinsya sa Sugbo nga daghan pa gihapon  ang mga tigpayuhot og ilegal nga drugas  ug gawasnon nga naglaroy-laroy diha sa Dakbayan sa Talisay.

Gibutyag ni Sr. Insp. Alejandro Batobalonos sa Drug Enforcement Unit (DEU) sa Provincial Intelligence Branch (PIB) nga magbalikbalik pa gyud sila sa maong siyudad gumikan sa mga ilegalista nga naa nagpuyo sa lugar. Nasayran nga subsob ang gihimong operasyon sa kapolisan sa maong siyudad ug sa kapolisan sa probinsya batok sa ilegal nga drugas sa maong siyudad apan padayon gihapon ang operasyon sa mga durugista.

Mismo si Pres. Duterte mihingalan sa Dakbayan sa Talisay nga “hot bed in illegal drugs” sa Sugbo tungod sa padayong operasyon sa mga sindikato sa ilegal nga drugas sa maong dapit.

Sa nasayran, katulo ka higayon na nga nakahimo og operasyon ang grupo ni Batobalonos sa Barangay Jaclupan kun diin ang ilang subject napatay gumikan sa pagsukol niini.

Niadtong miaging adlaw duha ka durugista ang ilang nasikop nga nakuhaan og 1.8 milyones nga kantidad sa shabu sa Barangay Dumlog.

Matud pa ni Batobalonos nga balik-balikan pa gyud nila ang Jaclupan kay mao kini napilian sa mga drug pushers gikan sa ubang lugar aron sila makapadayon sa ilang negosyo sa ilegal nga drugas.

Ang Jaclupan usa sa mga bukirong mga barangay sa maong siyudad ug daling makabantay ang mga ilegalista kun dunay moabot nga mga otoridad ug dali silang makasibat.

Apan si Batobalonos nibahad nga bisan asa pa motago ang mga nalambigit sa ilegal nga drugas matultolan ra gihapon sila sa kadugayan tungod sa kooperasyon sa mga residente. -  IBM (FREEMAN)