Drayber ni Garbo patay

CEBU, Philippines — Polis nga kanhi na-assign sa Police Regional Office 7 ang gipusil patay sa gituohang upat ka wala mailhing mga mamumuno gawas sa gipuy-an niini sa Barangay Pit-os ning Dakbayan sa Sugbo.

Ang nakalas naila nga si Police officer 2 Romeo Jumalon, kinsa padulong unta motambong sa Misa de Gallo kuyog sa iyang kapikas sa kinabuhi.

Ang hepe sa Talamban Police Station nga si Police Senior Inspector Alvin Llamedo, nitug-an nga nigawas ang biktima sa ilang balay aron andamon ang sakyanan niini sa dili pa sila mopadung sa simbahan.

Apan kalit niabot ang mamumuno sakay sa usa ka sakyanan dayon pusil kang Jumalon sa makadaghang higayon nga maoy naingnan sa hinanali niining kamatayon. Ang asawa niini nga anaa ra sa sakyanan wala maunsa.

Base sa inisyal nga kasayuran nga nakuha sa Talamban Police Station, si Jumalon natangtang sa serbisyo human nag-AWOL (absence without leave) sa iyang kanhi assignment niadtong tuig 2012. Nabalik siya sa serbisyo pinaagi sa reinstatement niadtong tuig 2016. Adunay mga report nga nahimo siyang drayber ug personal aide sa kanhi director sa Police Regional Office-7 nga gipasanginlan ni Presidente Duterte nga “narco-general” nga mao ang retiradong si General Marcelo Garbo Jr.

Gawas pa niana, giingon g aduna silay mga nadawat nga report kaniadto nga magsige sa mga casino si Jumalon apan walay kalambigitan sa iyang trabaho ang pagsige niya og adto didto.

Gipaabot pa nila ni Llamedo ang mga opisyal nga dokumento gikan sa Regional Personnel Holding and Accounting Unit aron subayon ang kanhi trabaho ni Jumalon ilabi na ang mga impormasyon mahitungod sa pagkabalik niya sa serbisyo. (BANAT NEWS)