Gibukobuko og dunggab patay

CEBU, Philippines – Patay ang usa ka 45- anyos nga lalaki human siya gidunggab sa 22 anyos nga lalaki didto sa Sitio Lawis, Barangay Luray Dos, sa Dakbayan sa Toledo niadtong Martes sa gabii.

Giila sa kapolisan ang biktima nga si Rommel Remullo Dalaguete, residente sa maong dapit.

Samtang ang gitumbok nga suspek sa maong krimen mao si Junrey Elladora Segovia, residente ra sab sa dapit. Sa inisyal nga imbestigasyon,  si Senior Police Officer 3 Thule Tahadlangit miingon nga adunay nakakita alas 7:30 sa gabii nga nag-inusarang nag-inom ang biktima sa usa ka tindahan sa dapit dihang giduol siya ni Segovia kinsa nagpuyo sa likod ra sa maong tindahan.

“Actually kanang duha dili na sila kaila, nagkalalis sila diha rang adlawa,” si Tahadlangit nagkanayon. Giingong human sa maong panaglalis, miuli og balik si Segovia ug mikuha og usa ka kitchen knife ug gidunggab si Dalaguete sa likod.

Nakaangkon og duha ka mga samad dinunggaban sa iyang kilid, abaga ug dughan ang biktima.

Nalup-og na si Dalaguete sa lugar ug gidala gihapon kini sa Toledo City Hospital apan giinggong gideklarar kini nga dead on arrival.

Butyag ni Tahadlangit nga aduna silay tulo ka mga saksi nga maoy nagtumbok nga si Segovia gyud ang suspek sa maong krimen hinungdan nga nadakpan dayon kini usa ka oras human nabuhat ang maong pagpangdunggab.

“Nagtuo siya nga walay nakakita niya, nang-hearing siya kun nailhan na ba ang nakapatay ug kung namatay na ba gyud,” sigun sa maong imbestigador.

Dihang nadakpan na, giingong mitug-an kini nga nasuko ra siya sa biktima atol sa ilang paghinabi.

“Base ra sad niya nga nasuko siya kay giingnan kuno siya nga ‘nganong makig-estorya man ko nimo nga ulahi ra man ka sa hunawan. Mao to nasuko siya og maayo,” sigun sa maong imbestigador.

Kasamtangan pa nga gipangita ang hinagiban nga gigamit sa krimen human giingong gilabay kini sa suspek ngadto sa suba. Kasong murder ang ipasaka sa kapolisan batok kang Segovia.

Sa pagsukit-sukit sa imbestigador nadeskobrehan nga initon gyud og ulo si Segovia. Gani, giingong nadunggaban niini ang iyang igsuong babaye atol sa ilang away apan wala ra kini gi-report sa kapolisan.

Buhi ra hinuon ang maong igsuong babaye sa suspetsado. (/IBM)(BANAT NEWS)