Regional traffic group makatabang sa trapiko sa Sugbo
CEBU, Philippines — Nanghinaut karon si Lapu-Lapu City Mayor Paz Radaza nga ang giumol nga Inter-Agency Council for Traffic (I-ACT) makasulbad sa suliran sa trapiko sa siyudad ingon man sa Sugbo.
Si Radaza nagkanayon nga tuod adunay mga motuman sa balaud sa trapiko, dili ikalimod nga aduna say mga gahig ulo nga padayong molapas sa balaud bisan og ka pila na gipahimangnuan.
“Dugay kaayo madisiplina ang mga tao,” matud pa ni Radaza kinsa midugang nga ang kasagarang malapason mao kadtong mga nag-apas alang sa ilang katagbawan.
Kahinumduman nga niadtong miaging buwan, ang I-ACT, usa ka regional inter-agency group ang opisyal nga gilusad subay sa kamanduan ni Presidente Rodrigo Duterte kini aron maoy motabang sa nagkagrabe nga problema sa trapiko sa Sugbo.
Ang maong grupo gilangkuban sa Land Transportation Office (LTO), Land Transportation and Regulatory Board (LTFRB), Department of Public Works and Highways (DPWH), Philippine Coast Guard (PCG), Department of Environment and Natural Resources (DENR), Philippine National Police (PNP), Armed Forces of the Philippines (AFP), mga the local government sa Sugbo ug ang ilang mga traffic division teams.
Trabaho sa regional traffic group mao pagpahigayon og operasyon batok sa mga kolorum nga mga sakyanan matud pa ni I-ACT national chairman Manuel Gonzales.
Gukdon usab sa maong grupo kadtong magpataka lang og parking sa ilang mga sakyan, mga illegal terminals ug pangtangtang sa mga makaali sa kadalanan. Lakip usab sa ilang trabaho mao ang paggukod niadtong mga fixers, mamuhatay og peke nga driver’s licenses, kadtong mag trip-cutting ug mag-overcharge og plete.
Si I-ACT Region 7 chairman ug LTO regional director Vic Caindec miingon atol sa paglusab sa maong grupo nga suportado sa mga LGUs sa Sugbo ang ilang grupo nga naglakip sa Mandaue, Carcar, Consolacion ug Liloan.
Sa iyang bahin si Radaza miingon nga suportado niya ang maong grupo.
“Oh, this is a great help from Duterte, daghan baya’g mga gahi og ulo (nga dapat displinahon),” matud pa ni Radaza.
Niadtong miaging tuig, ang Lapu-Lapu City government milusad og dungan nga discipline zones sa dagkong dalan sa maong siyudad.
Nahimo kini pinaagi sa tabang sa Lapu-Lapu City Police Office (LCPO) uban ang City Traffic Management Systems (CTMS) ug sa mga sakop sa nabungkag nga City of Lapu-Lapu Allied Force (CLAF).
Nasayran nga ang kagamhanan sa Lapu-Lapu mohatag og ganti ngadto sa mga sakop sa CTMS ug LCPO - Traffic Enforcement Unit kon makadakop sila og mga empleyado sa city hall, department heads ingon man city officials nga milapas sa balaud sa trapiko. (/DILT)(BANATNEWS)
- Latest
