Duha dugang napatay kontra drugas

CEBU, Philippines — Duha  ang namatay sa managlahing takna ug dapit nga anti-illegal drug operation sa Lapu-Lapu  City Police Office (LLCPO) ug  Mandaue City Police Office (MCPO)  samtang laing upat usab ang nasikop sa buy-bust operation sa kapolisan sa Lungsod sa Compostela.

Si Police Chief Inspector Rolly  Lauron sa Presinto 3 sa LLCPO miila sa suspetsao nga ilang napusilan nga mao si Janmell Benosillo, nagpuyo sa maong dapit.

Matud pa ni Lauron nga ilang gihimo ang buy-bust operation batok kang Benosillo base sa impormasyon nga nagpayuhot kini og ilegal nga drugas sa maong dapit.

Apan atol sa transaksyon nakabantay ang suspek sa customer nga polis kini ug dalidaling gipusil ang poseur buyer apan naunhan ug napatay. Nakuha gikan sa suspek ang rebolber nga armas, tulo ka medium size paketeng shabu ug P1,000 nga marked money .

Samtang sa Mandaue City, napatay usab sa kapolisan ang kanhi traffic enforcer sa maong siyudad nga si   Eduardo Baclohan, 32,  diha sa Sitio Villamanga sa Barangay Umapad ug nakuhaan og 11 ka gagmay nga paketeng shabu.

Si Chief Insp. Mercy Villaro, Public Information Officer (PIO) sa MCPO miingon nga nataktak sa trabaho si Baclohan tungod sa pagpunay og absent nga di mananghid ug pagmagahi pagpaubos sa drug test.

Samtang didto sa barangay Tabunok, Dakbayan sa Talisay, nakalas sa susamang adlaw, alas 8:30 sa gabii,  ang usa ka Ronaldo Valdez 18.

Nasuta nga adunay tatak nga 'Property of BJMP' ang armas ni Valdez ug gituohan kining iya sa usa sa mga gidisarmahang jailguards didto sa Maghaway sa maong dakbayan pipila ka bulan na ang nakalabay.

Ang mga gidisarmahan niadtong tungora mao sila si Eran Marquita ug Clay Gutierrez. Ang tulo ka mga inmates nga ilang gikuyogan padung unta sa Palace of Justice sa Talisay City nga silang Yayam Gaviola, 40; Marwin Abelgas, 27; ug Jovencio Rabadon, 36, gipaulanan og bala sa mga armadong mga lalaki nga nidisarma sa mga jailguards.

"Wala sad ta kahibaw kung giunsa pag-abot sa iyaha ang armas. Basig gibaligya ra sad but most likely suspect siya didto (Maghaway)," si Sinas miingon. (Camille Pateres/IBM)(BANATNEWS)