Ubay-ubay na nipahimulos sa libreng sakay

CEBU, Philippines — Human  duha ka gabii nga sa pagpadagan sa siyudad og van sa bukirang barangay sa Siyudad sa Sugbo, ubay-ubay nga mga trabahante sa Business Process Outsourcing (BPO) ang nakapahimulos sa libreng sakay.

Si Nanette Garong, pangulo sa call center program, niingon nga kung itandi niadtong Sabado sa gabii, ubay-ubay nga call center agents nga gikan sa Barangay Pit-os, Bacayan ug Talamban ang nakasakay sa van niadtong Domingo sa gabii.

“So far makaingon mi maayo and they took advantage of it. Pag first day dili pa kaayo daghan, kay ang purpose nato is to rescue. Ang gusto ni Mayor Osmeña nga masulbad dayon, matubag ang ni-request nga pahatagan og ruta,” siya niingon.

Gipalapdan sa siyudad ang coverage sa free ride ngadto sa bukirang barangay human sa nahitabong pagpamusil diin usa ka call center agent ang gipusil patay sa Barangay Bacayan sa niaging Sabado.

Ang mayor usab nakadawat og hangyo gikan sa mga trabante sa BPO nga ilakip sila sa free ride alang sa seguridad.

Ang pick-up nga dapit mao ang sa Flying V sa Barangay Pit-os ug moagi sa Ayala dayon ngadto sa IT Park Terminal sa Barangay Apas. Ang van magsugod og hatud sa call center agents alas 10 sa gabii ngadto sa alas 5 sa buntag.

Si Garong niingon nga aduna’y posibilidad nga mailisan ang sakyanan nga gipadala sa bukirang barangay kun grabe ang panginahanglan sa umaabot nga adlaw.

Sa pagkakaron, 12-seater nga van ang nagbiyahe sa nahisgutang ruta. (BANAT NEWS)