MGB naluoy sa trabahante sa Apo

CEBU, Philippines – Nipadayag sa ilang simpatiya ang Mines and Geosciences Bureau 7 sa mga trabahante sa Apo Cement nga apektado sa pagpanaktak og trabahante sa kompaniya. Matud ni Marian Codilla, information officer sa MGB-7, nga masulob-on sila sa gidangatan sa mga empleyado samtang ang ulohang buhatan ang may gahum sa paglibkas sa suspension sa operation sa Apo Land and Quarry Corporation. Nagpadayon ang reassessment sa lugar aron masuta kung asa gyud nga area nga malakip sa gideklarar nga danger zone human sa landslide sa Tinaan, Dakbayan sa Naga niadtong Septiyembre 20.

Sa laing bahin, gibalikan sa pagsusi ang quarry site sa QM Builders sa taga Provincial Environment and Natural Resources Office (PENRO), MGB ug mga opisyal sa Siyudad sa Talisay kagahapon sa buntag.

Kini aron pagsuta kung natuman ba sa QM Builders ang rekomendasyon sa PENRO aron mapugngan ang pagdahili sa yuta.

Ang mga residente sa Sitio Tiguib, Barangay Lagtang ang nabalaka nga masusama sila sa taga Siyudad sa Naga.

Si Niluna Jumeliza Monroid, mining engineer sa MGB-7, niingon nga wala sila’y nakitang problema sa quarry site. Nipasalig si Engr. Alan Quirante, tag-iya sa QM Builders, nga unom ka pamilya ang ilang mahatagan og financial assistance kinsa dili na makabalik sa pagpuyo duol sa quarry. (Gabriel C. Bonjoc/GMR)(BANAT NEWS)