Nagduwa og mahjong gipamusil usa patay
CEBU, Philippines — Upat ka mga lalaki nga nagduwa og mahjong ang gipamusil sa Sitio Cambyohan, Barangay Casili, lungsod sa Consolacion niadtong Sabado sa sa kaadlawon, usa nila ang nakabsan sa kinabuhi. Giila sa Consolacion Police Station ang namatay mao si Fernando Noval Amor ,50, nagpuyo sa maong dapit.
Samtang nangaangol ang mga kaduwa niini nga silang Gibson Cadampog 35; Ador Ermac Bentulan 36; ug si Martin Labrador, 49, mga residente sa maong dapit. Sigun pa ni Police Officer 2 Saturnino Inoc sa Consolacion Police Station naa sa usa ka piot nga eskinita nagsugal ang upat dihang kalit nga miabot ang usa ka wala pa mailhing lalaki ug gipamusil silang upat.
Dali nga gidala sa tambalanan ang mga biktima apan didto na namatay si Amor. Samtang anaa na sa luwas nga kahimtang ang tulo nga kaduwa niini.
Wala pa masayri kun si kinsa sa upat ang target gyud sa mamumuno.
“Wala pa matino ang motive. Naa hinuoy CCTV nakuha sa lugar, tanawonon pa to,” si Inoc miingon sa Banat News.
Niining pagsuwat, aduna nay person of interest ang kapolisan sa maong krimen. Kasamtangan pa nga gipalawman ang imbestigasyon kon kinsa nila ang adunay mga kaaway nga maoy posibleng utok sa krimen. (BANAT NEWS)
- Latest
