Langyaw milugos sa minors nga gihaylo niini’g iPhone

CEBU, Philippines – IPhone nga cellphone mao ra ang gipanghaylo sa langyaw ngadto sa mga menor de edad nga babaye bugti sa lawasnong kalipay. Apan wala magdugay ang iyang modus kay dali ra sab siya nga nadakpan.

Ang dinakpan mao si Stephen De Groot, 52, taga The Netherlands nga temporaryong nagpuyo sa Sta. Monica Estate sa Barangay Mohon, Dakbayan sa Talisay.

Si Chief Insp. Ardiolito Cabagnot, deputy chief sa Talisay City Police Station nagkanayon nga ang estilo ni Groot ang pagimbitar og mga menor de edad nga mag edad og 13, 14 ug 15 pinaagi sa iyang bugaw.

Upat ka babayeng menor de edad ang gipakaon ug gikuhaan niini og hulagway samtang gipanghambog ang iyang IPhone nga cellphone.

Niadtong Miyerkules sa gabii nibalik gyud ang duha ka menor de edad ug giingong aduna gyuy nahitabong lawasnong pagabuso niini ngadto sa duha bugti sa cellphone nga gusto sa mga menor de edad.

Usa sa mga ginikanan sa menor de edad ang nireklamo ug nidangop sa kapulisan hangtud nga ilang natultolan ang panimay sa suspek hangtud nga kini gidakop.

Matud pa ni Cabagnot nga ang 16 anyos nga babaye matured na para sa panan-aw sa langyaw mao nga gusto gyud siya og mas bata pa.

“Initial revelation sa bata, nahilabtan kuno in exchange sa iphone” matod ni Cabagnot.

Si Cabagnot nagkanayon nga si De Groot, bag-o pa lang nagpuyo sa maong dapit apan nabantayan kini sa mga silingan ug sa mga gwardya nga lain-laing mga bata ang dad-on niini sa iyang balay kada gabii.

Gisuwayan sa pagkuha og habig ang langyaw apan wala kini mitingog.

Samtang gipaubos na sa stress debriefing sa Provincial Women’s Commission (PWC) ang mga bata ug ilang ginikanan.

Matud ni Bise Gobernador Agnes Magpale kinsa maoy chairman sa PWC nga ang duha sa mga batang nabiktima anaa na karon sa ilang kustodiya samtang kadtong laing duha naa sa Talisay. (Le Phyllis F. Antojado/IBM)(BANAT NEWS)