CICC gihawanan sa squatters

CEBU, Philippines – Gihingusgan sa kagamhanan sa Dakbayan sa Mandaue ang paghawan sa mga istraktura sulod sa compound sa Cebu International Convention Center (CICC).

Sa niaging adlaw hinayhinay ang pagpabalhin sa 20 ka pamilya nga biktima sa sunog nga temporaryong nagpuyo sa lugar ngadto sa ilang bag-ong pinuy-anan. 

Gitabangan sa mga kawani sa Housing and Urban Development Office (HUDO) sa dakbayan ang mga pamilya sa pagpangguba sa ilang payag-payag ug gikarga ang ilang mga butang sa sakyanan sa City Engineering Office paingon sa ilang gibalhinan.

Si Tony Pet Juanico, pangulo sa HUDO, niingon nga ilang gihatud sa lainlaing lugar ang apektadong mga pamilya sama sa Consolacion ug may pipila namauli sa Dakbayan sa Talisay, Naga ug uban pa.

Ang 20 ka pamilya kabahin sa 183 ka pamilya nga nakadawat og cash assistance nga tag P10,000 gikan sa kagamhanan sa siyudad.

Ang hingpit nga paghawan sa CICC compound mao usab ang pagsugod na sa kaugmaran sa lugar ubos sa Mandaue City Public-Private Partnership Project.

Subay sa kasabutan tali sa siyudad ug Millenium Pan-Asia Hotel and Resort Inc. (MPAHRI), ang CICC mahimo kining “tourism magnet” sa Dakbayan sa Mandaue. -/GMR (BANAT NEWS)