50 mag-ilog sa 23 ka pwesto sa probinsiya
CEBU, Philippines — Moabot sa 50 kabuok ang nilansar sa nagkadaiyang posisyon sa Probinsiya sa Sugbo alang sa eleksiyon sunod tuig.
Ang 23 niini ilogan sa mga kandidato sa pagka-gobernador, bise gobernador, kongresista ug sangguniang panlalawigan member.
Sa gobernador adunay tulo ka kandidato nga sila si Kongresista Gwendolyn Garcia, Bise Gob. Agnes Magpale ug si Roliveth “Boyet” Cortes.
Sa pagka-bise gobernador, si Gob. Hilario Davide III ug magpatigayon nga si Daphne Salimbangon, anak ni Kong. Benhur Salimbangon sa ikaupat nga distrito.
Sa pagkasakop sa SP, adunay 25 kabuok ang nidagan sa pito ka distrito.
Sa pagka-kongresista, adunay 19 diin sa unang distrito sila si Talisay City Mayor Eduardo Gullas, ug Rodolfo Flormata ug Solomon Paypa.
Sa ikaduhang distrito sila si Kong. Wilfredo Caminero, Dalaguete Mayor Ronald Allan Cesante ug Cora Lou Kintanar.
Sa ikatulong distrito mag-ilog sa pwesto sila si kanhi Pinamungajan mayor Geraldine “Gaye” Yapha, kanhi kongresista Pablo John Garcia ug Toledo City Mayor John Henry Osmeña.
Sa ikaupat nga distrito mao sila si kanhi kongresista Celestino “Junie” Martinez ug asawa ni Kong. Salimbangon nga si Janice ang magsangka.
Sa ikalimang distrito mao sila si Kong. Ramon “Red” Durano VI, Cebu Port Authority Commissioner Vincent Franco “Duke” Frasco ug Alfie Pepito.
Sa ikaunom nga distrito mao sila si Emmarie “Lolypop” Ouano-Dizon, Atty. Baldomero Estenzo ug Walter Ouano-Dy samtang sa ikapito mao sila si Kong. Peter John Calderon ug kanhi Dumanjug mayor Nelson Garcia. (Romeo T. Limpangog/GMR)(BANATNEWS)
- Latest
