Siguridad sa pista sa Talisay andam na
CEBU, Philippines — Andam na ang kapolisan sa Siyudad sa Talisay sa ilang ipatuman nga seguridad alang sa kapistahan ni Sta. Teresa de Avila ugma, adlaw’ng Lunes.
Si Superintendent Marlu Conag, hepe sa kapolisan sa siyudad nagkanayon nga pagsugod pa lang sa mga kalihukan alang sa pista gibahin na niya ang iyang mga sakop aron dunay motutok sa matag kalihukan nga ipahigayon.
Gawas sa kaugalingong pwersa adunay mga personnel nga gikan sa Provincial Public Safety Company (PPSC) ang gidestino karon sa siyudad.
Gilauman nga sa maong adlaw magdasok ang mga tawo tungod sa mga deboto ug mamistahay nga mosuroy diha sa siyudad .
Subay usab sa pagpatuman sa kahusay ug kalinaw sa Dakbayan sa Talisay si Conag niawhag sa katawhan nga mo-report dayon sa kapolisan kong adunay mga tawo nga mamatikdan nga kadudahan ang lihok.
Si Conag nipahimangno usab ngadto sa katawhan nga magmabinantayon sa ilang pagsuroy-suroy unya sa siyudad atol sa pista aron dili sila mabiktima sa mga kiriwan. (/BDB)(BANATNEWS)
- Latest
