Comelec Mandaue wala pa makadawat og CoC

CEBU, Philippines — Nagpabiling mingaw ang buhatan sa Commission on Elections (Comelec) sa Dakbayan sa Mandaue sukad sa ilang pagbukas niadtong Huwebes hangtod kagahapon sa hapon.

Nagtuo si Marian Sesbraño sa Comelec Mandaue City nga sunod semana pa magsugod sa pagkisaw sa pagduso sa ilang mga Certificate of Candidacy (COC) ang mga nagtinguha sa pagkandidato sa 2019 elections.

Matud ni Sesbrano nga daghan na hinuon ang nagkuha og COC form nga ilang gituohan nga mga sinugo sa mga mokandidato ug ang pipila nagpakisayod sa  gikinahanglan nga rekisito sa mga mokandidato.

Gitataw ni Sesbrano nga ang Comelec Mandaue City, modawat lamang sa mga COC alang sa mga gustong mokandidato pagka konsehal, bise mayor ug mayor.

Dugang niini nga bisan og makabotar ang mga taga Mandaue sa duha ka bokal alang sa ika-unom nga distrito, gobernador, bise gobernador ug kongresista, ang Comelec Provincial Office lamang maoy modawat sa ilang mga COC. Sa nasayran ang line-up nila ni sixth district Congressman Jonas Cortes ug Board Member Glenn Bercede  mao usab ang ikaatbang sa  line-up nila ni  incumbent Mayor Luigi Quisumbing ug  incumbent Vice Mayor  Carlo  Fortuna sa 2019 midterm elections sa Siyudad sa Mandaue. (/DILT)(BANATNEWS)