Kongresista Cortes ug Lollypop nag-alyansa

CEBU, Philippines – Gipaabot sa mga lumolupyo sa Dakbayan sa Mandaue ang pormal nga pagpahibalo sa giingong pag-alyado ni 6th district Congressman Jonas Cortes ug kanhi konsehal Emmarie “Lollypop” Ouano-Dizon.

Si Cortes gikatakdang mosakbang kang incumbent Mayor Luigi Quisumbing alang sa iyang pagpasubli sa katungdanan isip mayor sa dakbayan samtang si Dizon ang mopapiling kongresista sa distrito karong umaabot eleksiyon sa Mayo, 2019.

Si 6th district Board Member Glenn Bercede mobalik usab kini sa pagkabise mayor sa nahisgutang dakbayan sa 2019 eleksiyon.

Gikataho nga ang grupo ni Quisumbing gikatakda usab nga makig-alyansa sa Hugpong ng Pagbabago ni Davao City Mayor Sarah Duterte -Carpio.

Si Bise Mayor Carlo Fortuna nibutyag nga ang ilang pormal nga panag-alyansa gikatakda nga pagahimuon karong Oktubre 22 niining tuiga.

Apan giklaro ni Fortuna nga ang ilang pundok ni Quisumbing magpabilin gihapon sa pagpasilong sa nasudnong partido nga mao ang PDP Laban.

Matud pa ni Fortuna nga dako ang bentaha kon makig-alyansa sila sa dominante nga partido tungod kay makaangkon kini og prebilihiyo nga kinahanglan sa pagpalig-on sa kandidatura sa grupo nga nahisakop niini.

Gipasabot ni Fortuna nga ang HnP usa lang ka rehiyonal nga partido ug wala usab nila isalikway ang pagpakig-alyansa sa lokal nga partido dinhi sa Sugbo kon ugaling kinahanglanon man sila  sa pagpalig-on sa kandidatura sa mga lokal nga kandidato.

Sa laing bahin, gitug-an ni Bise Gobernador Agnes Magpale nga magpabilin nga alyansa sa Barug Alang sa Kauswagan ug Demokrasya (BAKUD) Party ang Nationalist Peoples Coalition (NPC).

Matud ni Magpale nga ang NPC lang gihapon ang ilang national party sa umaabot nga midterm election sa sunod tuig. Si kanhi kongresista Ace Durano maoy chairman sa NPC sa Sugbo.

Si Magpale nagkanayon nga sa Probinsya sa Sugbo lain-lain ang partido sa ilang mga kandidato sama sa mga bokal diin adunay mga bokal nga sakop sa Liberal Party, NPC ug National Unity Party (NUP). (Le Phyllis F. Antojado/BDB)(BANAT NEWS)