Garma: Di lang trabaho sa polis
CEBU, Philippines — Mireklamo si Police Senior Supt. Royina Garma, hepe sa Cebu City Police Office bahin sa mga pasangil batok kanila sa mga nahitabong pagpatay dinhi sa Sugbo kay matud niya gibuhat nila ang tanan apan kuwang lang gyud sila og tawo ug kuwang og suporta sa lokal nga kagamhanan.
“Now they admit that there are crimes being committed, did they ask us kung kulang kami ng tao? Did they do something on their level na pwede nilang gawin? Sige lang sila tira, ginawa ba nila ang responsibility nila?”tubag ni Garma.
Matud niya dili lang ang polis maoy gitahasan pakigbatok sa krimen kondili apil ang lokal nga kagamhanan.
Usa sa misaway nila si Gobernador Hilario Davide III kinsa mao usab ang chairman sa Regional Peace and Order Council (RPOC) 7 kinsa midason sa unang pamahayag kaniadto ni Cebu City Mayor Tomas Osmeña nga ‘criminal city’ na ang dakbayan nunot sa sagunsong pagpatay kay dili na kini luwas. Gisigundahan usab kini ni Cebu City Councilor Pastor Alcover Jr.
Gusto nila ang National Bureau of Investigation-7 ug ang Commission on Human Rights-7 ang moimbestigar sa nahitabo sa Malubog.
Niadtong adlaw nga Huwebes lima ka mga tawo ang gipatay nga gituohang summary killings sa Malubog. Nianang adlawa, may tulo usab ka durugista ang napatay sa One Time Big Time operation sa kapolisan. Sa kinatibuk-an, miabot og 15 ka tawo ang nakalas nianang adlaw nga Huwebes.
“Imbes na nagtutulongan, we are giving judgment instead of solutions. It will not do good. It will not solve the problem,” si Garma nagkanayon. (BANATNEWS)
- Latest
