Minors nagtinusikay sa plaza bisa’g udto

CEBU, Philippines — Pangitaon sa pangu sa Department of Education (DepEd) sa Siyudad sa Talisay ang mga menor de edad nga naghimo og law-ay nga buhat sa sud sa compound sa Talisay City Hall sa miaging adlaw.

Si Dr. Leah Noveras, schools division superintendent sa maong dakbayan nagkanayon nga dili siya makatugot sa maong binuhatan sa maong mga tinun-an.

Sa pagkakaron, iyang gimanduan ang guidance counselor sa matag tunghaan nga gi-eskwelahan sa duha ka menor aron sila maoy mopasabot nga dili maayo ang ilang gibuhat.

Sa nasayran, wala panumbalinga sa duha ka menor de edad ang kainit sa udtong tutok samtang sila nagrubo-rubo sa Plaza Talisay nga sulod sa compound sa Talisay City Hall.

Si Junjun Dela Rosa, sakop sa Civil Security Unit (CSU) mibutyag nga ang lalaki nagpangedaron og 16 anyos samtang ang babaye nag edad og 15 anyos. Ang babaye nagtungha sa pampublikong tunghaan samtang ang lalaki nagtungha dili ra layo sa city hall.

Matud ni Dela Rosa nga nag-abot sa nahisgutang dapit ang mga menor de edad kay mga atleta kini sila og magpraktis unta sa lugar. Apan niadtong higayona hayan nag-abot ang duha ug nagpalandong sa kahoy ug nagpasalipod sa mga tanom.

“Nagchula gyud ang duha, nagkinuotay naman gani. Padung na gud sila nga manghigda,” asoy pa ni Dela Rosa.

Ang gwardiya nga naa sa guardhouse duol sa Cebu South Coastal Road maoy nakakita sa duha nga nagtinusikay.

Dali kini niyang gibadlong ug gidala sa buhatan sa City Social Welfare and Development (CSWD) gumikan sa ilang pangidaron.

Sa pagkakita sa lalaking menor sa iyang iyaan nga trabahante sa maong buhatan kalit kining nakuyapan.

Gitambagan ang duha nga dili na kini nila usbon samtang gipapauli ra sab kini sa ilahang panimay. (/DILT)(BANATNEWS)