KBP-Cebu motabang sa Naga

CEBU, Philippines — Agi og pagtahod ug pagduyog sa kasubo sa mga biktima sa landslide sa Tinaan, sa Dakbayan sa Naga, dili na magpahigayon og engrandeng party ang mga sakop sa Kapisanan ng mga Broadcasters ng Pilipinas –Cebu Chapter karong umaabot nga Sabado aron ang pundong gastuhon ihatag na lang isip tabang kanila.

Matud pa sa Chairman sa KBP ug General Manager sa DyRF Fr. Roberto Ebisa, SVD,  isip usa ka Sugbuanon ug alagad sa Ginoo dili siya makaako nga maglipaylipay kauban ang mga magsisibya unya adunay daghan nagbangutan ug naa sa kagul-anan tungod sa landslide.

Sumala pa ni Ebisa nisuporta ang nagkadaiyang station managers nga di na lang mag-party ug ihatag na lang ang budget isip tabang sa KBP-Cebu Chapter ngadto sa mga biktima.

Matud niya, dili lang kutob sa pagbalita ang kaakohan sa mga sakop sa media sa Sugbo kay mobati usab sila sa uban.

Sa laing bahin, siyam ka pamilya kansang kabanay namatay sa landslide ang gihatagan og tag P4 mil hangtud P5 mil isip hinabang sa Truck-up Club-Carcar and Minibus Operator, nga gipangulohan ni Julieto “Julie” Flores.

Kadtong wala pa makadawat, mahimong makatawag sa ilang numero nga ilaha nang gihatag sa DSWD.

Samtang si Kerwin Macopia, ang tigpamaba sa DSWD-7 nitug-an nga 11 ka pamilya ang nakadawat og tag P25 mil nga burial assistance ug isunod usab ang uban.

Sa pikas bahin, dili mominos sa 30 ka mga environmental advocates ug mga kabanay sa pipila sa mga biktima ang niapil sa rally kagahapon sa buntag sa atubangan sa Apo Cement Plant sa Barangay Tinaan ug sa City Hall sa Naga aron sa pagpadangat sa ilang panawagan sa paghunong sa quarry operations.

Usa sa mga nikuyog sa rally ang ig-agaw sa watchman sa Apo Land Quarry Corp nga gikabalak-ang natabunan usab sa yuta.

Samtang ang manager sa National Housing Authority nga si Marcelino Escalado mipahibalo nga 320 ka balay ang una nilang buhaton alang sa mga pamilyang direktang naapektahan sa landslide ug kadtong mga nagpuyo sa danger zone.  – IBM (BANAT NEWS)